Վաշինգտոնը պետք է փոխի իր դիրքորոշումը Բաքվի նկատմամբ, որպեսզի Միացյալ Նահանգները կարողանա միջնորդել Ադրբեջանի և Հայաստանի խաղաղ բանակցություններում: Այդ մասին Newsweek ամերիկյան ամսագրին տված հարցազրույցում ասել է Ադրբեջանի նախագահ Իլհամ Ալիևի արտաքին քաղաքականության վարչության ղեկավար Հիքմեթ Հաջիևը։
Նրա խոսքով՝ ԱՄՆ պետքարտուղարի Եվրոպայի և Եվրասիայի հարցերով օգնական Ջեյմս Օ'Բրայենի մեկնաբանությունները «Ղարաբաղում այս տարվա սեպտեմբերին իրականացված հակաահաբեկչական միջոցառումների վերաբերյալ հավասարակշռված չէին»:
Ջեյմս Օ'Բրայենը քննադատել է ադրբեջանական կողմի նախաձեռնած ռազմական հարձակումը, որն ի վերջո հանգեցրել է ԼՂՀ լուծարմանը և Արցախի հայաթափմանը:
«Դա միակողմանի մոտեցում էր, որն անհանգստություն է առաջացրել Ադրբեջանում», - ասել է Հաջիևը:
Նրա փոխանցմամբ՝ Ազատության աջակցության ակտի 907 ուղղումը շարունակում է հիասթափություն առաջացնել Բաքվում: Հաջիևն այն անվանել է «անհասկանալի» և «ամերիկյան Կոնգրեսի պատմության մեջ ամենաանարդար լրամշակումներից մեկը»։
«Ադրբեջանն օտարերկրյա օգնության կամ աջակցության կարիք չունի: Ադրբեջանն ինքնաբավ երկիր է։ Բայց այստեղ շատ կարևոր է հոգեբանական հանգամանքը, քաղաքական հանգամանքը, քանի որ Ադրբեջանի նկատմամբ նման վերաբերմունքն արդար չէ», - ասել է Հաջիևը:
Նա պնդել է, թե այդ լրամշակումը խոչընդոտում է Ադրբեջանի և Հայաստանի խաղաղության համաձայնագրի կայացմանը նպաստելու համար Վաշինգտոնում հանդիպումներ անցկացնելու ամերիկացիների ջանքերը:
«Մենք ակնկալում ենք, որ ԱՄՆ գործադիր իշխանության կողմից կարող է այլ վերաբերմունք լինել, հենց լինի՝ կարող ենք շարունակել {հայ-ադրբեջանական} քննարկումները Վաշինգտոնում», - նշել է Հիքմեթ Հաջիևը:
