«Համաս»-ը հայտարարել է, որ Ջաբալիա փախստականների ճամբարին Իսրայելի հարվածների հետևանքով ավելի քան 195 պաղեստինցի է զոհվել։
Արևմտյան լրատվամիջոցները նշում են, որ ընթացող պատերազմի պայմաններում հնարավոր չէ ստուգել պաղետսինյան աղբյուրների հրապարակած տվյալների արժանահավատությունը:
Իսրայելի հասցրած հարվածները ՄԱԿ-ի մարդու իրավունքների պաշտոնյաների կարծիքով, կարող են լինել ռազմական հանցագործություններ:
Ըստ Reuters-ի՝ հինգշաբթի օրը ավելի շատ օտարերկրացիներ են պատրաստվում լքել շրջափակված Գազայի հատվածը։
Նախնական ցուցակագրված 500 օտարերկրացիներից առնվազն 320-ը, ինչպես նաև տասնյակ ծանր վիրավոր բնակիչներ չորեքշաբթի «Ռաֆահ»-ով անցել են Եգիպտոս՝ Իսրայելի, Եգիպտոսի և «Համաս»-ի միջև կնքված գործարքի շրջանակներում:
Տարհանվածներն ունեցել են Ավստրալիայի, Ավստրիայի, Բուլղարիայի, Չեխիայի, Ֆինլանդիայի, Ինդոնեզիայի, Իտալիայի, Ճապոնիայի, Հորդանանի, Միացյալ Թագավորության և ԱՄՆ-ի անձնագրեր։ Դիվանագիտական աղբյուրը հայտնել է, որ մոտ 7 հազար 500 օտարերկրյա անձնագրեր ունեցողներ երկու շաբաթվա ընթացքում կլքեն Գազան։
