Բաքուն հիմա շահագրգռված չէ բոլոր արցախահայերի հեռացումով
Այսօր՝ սեպտեմբերի 21-ին, Հայաստանը չափազանց լարված կացության մեջ է նշելու Անկախության օրը: Երեկոյան Նյու Յորքում, ՄԱԿ-ի Անվտանգության խորհրդում կքննարկվի Լեռնային Ղարաբաղում ստեղծված ծանրագույն իրավիճակը: Մինչ այդ էլ Եվլախում պետք է տեղի ունենա Լեռնային Ղարաբաղի հայության ներկայացուցիչների և Ադրբեջանի Հանրապետության պաշտոնյաների հանդիպումը:
Երկու հարցերն «Ազատության» խնդրանքով մեկնաբանել է քաղաքական վերլուծաբան Բորիս Նավասարդյանը:
Նա ենթադրում է, որ Եվլախում Ադրբեջանը ներկայացնելու է հայերի «ինտեգրման ծրագիրը»: Վերլուծաբանի համոզմամբ, Բաքուն գոնե այս պահին շահագրգռված չէ Արցախից ամբողջ հայ բնակչության հեռանալով և փորձելու է ներկայացնել այնպիսի առաջարկներ, որոնք ընդունելի կլինեն գոնե մի մասի համար:
«Թե ինչքանով երաշխավորված կլինի այդ առաջարկների իրականացումը գործնական առումով՝ դժվար է ասել, քանի որ շատ լավ գիտենք Ադրբեջանի հասարակությունում տիրող տրամադրությունները: Նրանք դեմ են հատուկ պայմանների ստեղծմանը հայերի համար, քանի որ դա անմիջապես կհրահրի խոսակցություններ այն մասին, թե ինչու անջատողական քաղաքականություն իրականացրած ժողովուրդը պետք է այսօր օգտվի ինչ-որ բարիքներից», - ասաց Նավասարդյանը:
Ըստ նրա, Ադրբեջանի իշխանությունը չի կարող հաշվի չառնել այդ տրամադրությունները, բայց բոլոր դեպքերում փորձելու է ինչ-որ միջոցներով սահմանափակել միջազգային տարբեր հարթակների կողմից Բաքվին հասցեագրված քննադատությունը:
Դժվար թե Նյու Յորքում առաջարկվեն կոնկրետ քայլեր
Պատասխանելով այն հարցին, թե ինչ է հնարավոր ակնկալել նյույորքյան քննարկումներից, քաղաքական վերլուծաբանն ասաց, որ սեպտեմբերի 21-ի ՄԱԿ-ի Անվտանգության խորհրդի նիստում, ինչպես և նախորդ նիստում էր, որոշ տարբերություններով կարձանագրվի աջակցություն արցախահայերի իրավունքների և անվտանգության ապահովման վերաբերյալ, սակայն դժվար թե առաջարկվեն դրա իրականացմանն ուղղված անհրաժեշտ գործիքներ:
«Որևէ լուրջ փաստաթղթի դեմ՝ բանաձև կամ հայտարարություն, հանդես կգան Ռուսաստանը և գուցե Չինաստանը: Այդ երկու երկրների միջև կա համաձայնություն առ այն, որ բոլոր խնդիրները Հարավային Կովկասում, այդ թվում՝ Արցախում, պետք է լուծվեն տարածաշրջանային խաղացողների կողմից: Այլ միջազգային կառույցների և խոշոր խաղացողների ներգրավվածության դեմ հանդես են գալու ՄԱԿ-ի Անվտանգության խորհրդի մշտական անդամներից գոնե երկուսը», - նշեց Բորիս Նավասարդյանը:
Ռուսները նորից կարող են ներկայացնել հայ-ադրբեջանական սահմանին զորախումբ տեղակայվելու գաղափարը
Վերլուծաբանի խոսքով՝ ՄԱԿ-ի Անվտանգության խորհրդի դեռ նախորդ նիստում հնչել մի գաղափար, թե ՀԱՊԿ-ը պետք է իր դերակատարությունն ունենա այս հակամարտության կարգավորման գործում:
Ամենայն հավանականությամբ, Ռուսաստանն առաջ կտանի այդպիսի գաղափարներ: Ըստ Նավասարդյանի, հայկական կողմին կարող են նորից առաջարկել, որ հայ-ադրբեջանական սահմանին տեղակայվեն սահմանապահներ՝ կա՛մ ՀԱՊԿ-ի, կա՛մ Ռուսաստանի դրոշի ներքո: Գուցե ՄԱԿ-ի ԱԽ նիստի մասնակիներից մի քանիսը հավանություն կտան այդ գաղափարին:
Այդ զորախումբը վեճերը լուծելու է հօգուտ Ադրբեջանի
«Արցախում տեղակայված ռուսական խաղաղապահ զորախումբը եթե ոչ ամբողջությամբ, ապա առնվազն մասամբ ստիպված կլինի մոտակա ժամանակներս հեռանալ այնտեղից, և չի բացառվում, որ հենց այդ կրճատված ռեսուրսներով կձևավորվի զորախումբը, որը կանգնած կլինի հայ-ադրբեջանական սահմանին», - ասաց Նավասարդյանը:
Նրա համոզմամբ՝ դա ազգային շահերի կամ անվտանգության ապահովման առումով Հայաստանին որևէ երաշխիք չի տալու, քանի որ «Ադրբեջանի հետ ցանկացած վիճելի հարց այդ զորախմբի, կամ սահմանապահների, կամ ՀԱՊԿ ստորաբաժանման կողմից լուծվելու է հօգուտ Ադրբեջանի, այլ ոչ թե Հայաստանի»:
