Կիրակի օրը Ռուսաստանի նախագահ Վլադիմիր Պուտինը հայրենակիցներին հեռուստատեսությամբ հավաստիացրել է, որ հակառակորդի՝ ասել է թե ուկրաինացիների բոլոր ռազմական գործողությունները ձախողվել են։
«Մեր պաշտպանական դիրքերը ճեղքելու հակառակորդի բոլոր փորձերը, այդ թվում՝ ռազմավարական ռեզերվների օգտագործմամբ, նրանց հարձակման ընթացքում ձախողվել են, հակառակորդը հաջողություն չունի»,- ասել է Ռուսաստանի ղեկավարը:
Եվ ահա, անցել է մի քանի ժամ, և ռուսների կողմից զավթված Ղրիմից հրատապ լուր է հաղորդվել՝ հերթական անգամ գրոհի է ենթարկվել թերակղզին Ռուսաստանի հետ կապող ռազմավարական նշանակության կամուրջը:
Պայթյունների հետևանքով զոհվել են ավտոմեքենայում գտնվող ամուսիններն ու վիրավորվել է նրանց փոքրիկ դուստրը: Ըստ բժիշկների՝ երեխան միջին ծանրության վիճակում է: Երթևեկությունը միառժամանակ դադարեցվել է:
Մոսկվայի կողմից Ղրիմի ղեկավար նշանակված Սերգեյ Ակսյոնովն ասել է, որ պայթյունը տեղի է ունեցել կամրջի 145-րդ հենասյան հատվածում:
Անցյալ տարվա հոկտեմբերին այդ կամուրջը գրոհի էր ենթարկվել, սակայն Ուկրաինան բացահայտ դրա համար պատասխանատվություն չի ստանձնել և միայն ամիսներ անց անուղղակի ակնարկներով է նկատել տվել, որ գուցե ինչ-որ առնչություն ունի դրա հետ:
Ռուսաստանի հակաահաբեկչական պետական կոմիտեն այսօր վաղ առավոտյան տեղի ունեցած գրոհն անվանել է ահաբեկչական գործողություն: Ռուսաստանի քննչական կոմիտեի պաշտոնական ներկայացուցիչ Սվետլանա Պետրենկոն ասել է, որ հարուցվել է քրեական գործ, կասկածյալներն ուկրաինացիներ են:
«Հետաքննությունը պարզում է ուկրաինական հատուկ ծառայությունների և զինված կազմավորումներից անձանց, որոնք ներգրավված են այս հանցագործության կազմակերպման ու իրականացման գործում»,- ասել է Պետրենկոն։
Մասնագետների փոխանցմամբ, գրոհն իրագործվել է երկու ծովային ԱԹՍ-ներով:
Այդ գերարդիական և գերթանկ կամուրջը Կրեմլի հպարտությունն էր, այն բացել է անձամբ Պուտինը: Սոցիալ-տնտեսական և խորհրդանշական մեծ նշանակությունից զատ այն նաև չափազանց կարևոր է Ղրիմում տեղակայված ռուսական ստորաբաժանումների մատակարարման համար: Կամրջի երկաթուղային գծով երթևեկությունն արդեն վերականգնվել է:
Այսօր սպառվում հացահատիկի գործարքի ժամկետը. ռուսական կողմը հայտնել է՝ չի երկարաձգի գործարքը
Այսօր ռուս-ուկրաինական ճակատից հաղորդվել է կարևոր մեկ ուրիշ լուր, որը հրատապ է ամբողջ միջազգային համայնքի ու հատկապես պարենի խնդիրներ ունեցող Մերձավոր Արևելքի, Հյուսիսային Աֆրիկայի և Ասիայի երկրների համար:
Այսօր սպառվում է ՄԱԿ-ի և Թուրքիայի միջնորդությամբ կնքված ռուս-ուկրաինական հացահատիկի գործարքի ժամկետը:
Ուկրաինական նավահանգիստներում պաշարված պարենը՝ ցորեն, եգիպտացորեն, բուսական յուղ և պարարտանյութեր, այդ գործարքով փոխադրվել են պարենի կարիքն ունեցող երկրներ:
Ռուսները հայտնել են, թե չեն երկարաձգի գործարքը, քանի որ դրա Ռուսաստանին վերաբերող մասը չի կատարվել: Մոսկվան հայտնել է, որ դա կապ չունի Ղրիմի կամրջի միջադեպի հետ, ավելացնելով, թե պատրաստ է վերադառնալ գործարքին այն բանից հետո, երբ դրա ռուսական դրույթներն կիրականացվեն:
Թուրքիայի նախագահ Ռեջեփ Թայիփ Էրդողանն այսօր հույս է հայտնել, որ ռուսներն, այնուամենայնիվ, կշարունակեն գործարքը:
«Չնայած այդ հաղորդագրությանը, ես հուսով եմ, որ իմ բարեկամը, Ռուսաստանի նախագահ Վլադիմիր Պուտինը ցանկանում է, որ այս մարդասիրական կամրջի աշխատանքը շարունակվի»,- ասել է Էրդողանը:
Նա նշել է, որ երբ Պուտինն օգոստոսին կայցելի Թուրքիա՝ գործարքի հետ կապված ռուսական կողմի բոլոր մտահոգությունները հնարավոր կլինի տեղում քննարկել:
Այդ լուրին է անդրադարձել նաև Եվրոպական միության արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելը:
«Ցավով պետք է տեղեկացնեմ, որ ռուսները հրաժարվել են երկարաձգել գործարքը: Դա մեծ խնդիրներ կստեղծի աշխարհում: Մենք մեր կողմից ամեն բան կանենք ուկրաինական հացահատիկը դրա սպառողներին հասցնելու համար: Եվ ես մեղադրում են Ռուսաստանին, որը պարենի հարցը զենք է դարձնում», - ասել է Բորելը:
