Ադրբեջանի նախագահ Իլհամ Ալիևը հուլիսի 11-ին ասել է, որ առաջիկա օրերին տեղի կունենան Հայաստանի հետ բարձր մակարդակով բանակցություններ խաղաղության պայմանագրի շուրջ: Նա ակնկալում է դիրքորոշումների հետագա մերձեցում։
«Մեր դիրքորոշումը հստակ է, տրամաբանական և հիմնված է միջազգային իրավունքի վրա։ Կարծում եմ՝ այդ սկզբունքների հիման վրա կարելի է խաղաղության պայմանագիր կնքել։ Բոլոր դեպքերում, իմ կարծիքով, կա նման հնարավորություն» - ասել է Ալիևը:
Այդ մասին նա խոսել է 2023 թվականի առաջին կիսամյակում Ադրբեջանի սոցիալ-տնտեսական զարգացման թեմայով խորհրդաժողովում:
«Մենք դրան ենք ձգտում, այդ նախաձեռնությունն ենք առաջ տանում։ Բայց պետք է ասեմ, որ ամեն ինչ չէ, որ կախված է Ադրբեջանից, հակառակ կողմն էլ պետք է պատրաստ լինի և խոսքերով արտահայտած սկզբունքները թղթին փոխանցի»,- ասել է Ալիևը:
Չնայած Ադրբեջանի հետ հարաբերություններում եղած բարդություններին, Փաշինյանը հուլիսի վեցին հայտարարել էր, որ խաղաղության օրակարգն այլընտրանք չունի. - «Լեռնային Ղարաբաղի հայության իրավունքներն ու անվտանգությունը պետք է հասցեագրվեն Բաքու-Ստեփանակերտ երկխոսության միջազգային մեխանիզմների շրջանակներում, իսկ Հայաստանի և Ադրբեջանի միջև պետք է խաղաղության պայմանագիր ստորագրվի»:
Այնուամենայնիվ, ըստ վարչապետի, վաշինգտոնյան վերջին բանակցությունների ընթացքում առաջընթացը շոշափելի չէ, իսկ խաղաղության պայմանագրի տեքստը պատրաստ չէ ստորագրման:
