Կրեմլի երեք շքեղ սրահները
Այսօր Կրեմլի Գեորգևյան սրահում տեղի է ունեցել Ռուսաստանի և Չինաստանի նախագահներ Վլադիմիր Պուտինիի և Սի Ծինպինի պաշտոնական հանդիպման արարողակարգը:
Չինաստանի ղեկավարը երեկ է պետական այցով ժամանել Մոսկվա: Խորհրդանշական է, որ սա Սի Ծինպինի առաջին արտասահմանյան ուղևորությունն է այդ պաշտոնում երրորդ անգամ վերընտրվելուց հետո: Երեկ նախագահներ Պուտինը և Ծինպինը ոչ պաշտոնական հանդիպում են անցկացրել և ի շարս այլ թեմաների, քննարկել են նաև Ուկրաինայի պատերազմի կարգավորման հնարավորությունը:
Այսօր Գեորգևյան սրահում նվագախումբը կատարել է երկու գերտերությունների օրհներգերը, դրանից հետո պատվիրակությունները տեղափոխվել են Կրեմլի Եկատերինյան սրահ, որտեղ նեղ կազմով բանակցություններ են տեղի ունեցել:
Ապա նախագահները և երկու պատվիրակությունները տեղափոխվել են Ալեքսանդրյան սրահ, որտեղ արդեն ընդլայնված կազմերով են բանակցել:
Փաստաթղթերի ստորագրման արարողությունն էլ տեղի է ունեցել Կրեմլի Մալաքիտի ճեմասրահում:
Առևտրի տարեկան ծավալը հասցնել 200 միլիարդ դոլարի
Կողմերը ստորագրել են երկու փաստաթուղթ՝ առաջինը համապարփակ գործընկերության և ռազմավարական համագործակցության խորացման մասին է, երկրորդը՝ մինչև 2030 թվականը ռուս-չինական համագործակցության առանցքային ուղղությունների զարգացման ծրագիրն է:
Այդ երկու հայեցակարգային փաստաթղթերից բացի կողմերը կնքել են նաև տարբեր ոլորտներում մոտ տասնյակ առանձին համաձայնություններ:
Էներգետիկա, ռազմատեխնիկական համագործակցություն և առևտուր: Միջազգային զարգացումներից բացի այդ թեմաներն են ռուս և չինացի պաշտոնյաների հանդիպումների օրակարգում:
Ռուս-չինական փոխադարձ առևտրի տարեկան ծավալը 185 միլիարդ դոլար է և հետզհետե ավելանում է: Պուտինն այսօր ասել է, որ արդեն այս տարի այն կհասնի և կհատի 200 միլիարդ դոլարի սահմանը:
Սի Ծինպինն, իր հերթին, գովեստով նշել է, որ Չինաստանը և Ռուսաստանը մտադիր են զարգացնել համագործակցությունը տնտեսության, էներգետիկայի, ներդրումների, մշակույթի և այլ ասպարեզներում:
Բանակցություններին ռուսական կողմից մասնակցել են անվտանգության խորհրդի փոխնախագահ, նախկին նախագահ և նախկին վարչապետ Դմիտրի Մեդվեդևը, արտաքին գործերի և պաշտպանության նախարարներ Սերգեյ Լավրովը և Սերգեյ Շոյգուն, Կենտրոնական բանկի նախագահ Էլվիրա Նաբիուլինան, ռազմատեխնիկական համագործակցության դաշնային ծառայության տնօրեն Դմիտրի Շուգաևը, «Ռոսկոսմոսի» տնօրեն Յուրի Բորիսովը և բարձրաստիճան այլ պաշտոնյաներ:
Պուտինը գովեստով է խոսել խաղաղության չինական ծրագրի մասին
Փաստաթղթերի ստորագրումից հետո երկու ղեկավարները հանդես են եկել հայտարարություններ, ապա Կրեմլում տրվել է պաշտոնական ճաշ ի պատիվ Չինաստանի ղեկավարի:
Ուկրաինայում, Միացյալ Նահանգներում և Եվրոպայում սպասել են, թե ինչ կասեն նախագահները ռուս-ուկրաինական պատերազմի դադարեցման հնարավորության մասին:
Պուտինն ասել է, որ Չինաստանի առաջարկած խաղաղության ծրագրի շատ դրույթներ կարող են դրվել կարգավորման հիմքում, «երբ դրան պատրաստ կլինեն Արևմուտքում և Կիևում, ինչը դեռ չի նկատվում»:
Չինաստանը փետրվարի 24-ին է հրապարակել 12 կետ պարունակող ծրագիրը, որում նշվում է ինքնիշխանության և տարածքային ամբողջականության սկզբունքների կարևորությունը, կոչ է արվում հրադադար հաստատել, սակայն հստակ չի ասվում Ուկրաինայից ռուսական ուժերը հեռացնելու մասին:
