Երբ ամբողջ աշխարհի ուշադրությունը կենտրոնացած է ռուս-ուկրաինական հակամարտության վրա, իրավիճակը Լեռնային Ղարաբաղում վատթարանում է, հայտարարել է Եվրոպական խորհրդարանի Գերմանիան ներկայացնող պատգամավոր Լարս Պատրիկը։
«Ադրբեջանական զինուժը 2022 թվականի մարտի 24-ին հարձակվել է Փառուխ գյուղի վրա, իսկ 2022 թվականի մայիսի 28-ին խախտել հրադադարի ռեժիմը՝ մահացու վիրավորելով մեկ հայ զինվորի։ Դա տեղի է ունեցել Ադրբեջանի նախագահ Իլհամ Ալիևի կոշտ հայտարարությունից մեկ օր անց, ով ուժի կիրառումը ներկայացնում էր որպես միջազգային իրավունքի պահպանումն ապահովելու փորձ՝ պնդելով, որ «Լեռնային Ղարաբաղի հակամարտությունն ամբողջությամբ լուծված է», պահանջներ դրել Հայաստանի ինքնիշխան տարածքի նկատմամբ և օգտագործել կոշտ բառեր՝ ասելով, որ «ազգայնականները Հայաստանում չպետք է նայեն մեր կողմը, եթե չեն ուզում, որ իրենց գլուխները նորից ջարդվեն», - հայտարարությունում նշել է պատգամավորը։
Պատրիկը նկատել է՝ այդ գործողություններն ու հայտարարությունները բացահայտորեն հակասում են 2020 թվականի նոյեմբերի հրադադարի համաձայնագրի դրույթներին, ինչպես նաև 2022 թվականի մայիսի 22-ին Բրյուսելում Հայաստանի, Ադրբեջանի և ԵՄ-ի եռակողմ հանդիպումից հետո արված հայտարարության ոգուն։
Լեռնային Ղարաբաղում իրավիճակի սրացման հետ կապված նա հարց է ուղղել ԵՄ արտաքին գործերի և անվտանգության քաղաքականության հարցերով գերագույն ներկայացուցիչ Ժոզեպ Բորելին. - «Ի՞նչ կոնկրետ քայլեր է ձեռնարկում Արտաքին գործողությունների Եվրոպական ծառայությունը Լեռնային Ղարաբաղում ռազմական գործողությունների վերսկսումը կանխելու և կողմերի միջև կառուցողական երկխոսությունը շարունակելու համար»:
