Օգոստոսի 7-ի լույս 8-ի գիշերը և առավոտյան 09:00-ի դրությամբ էական միջադեպեր չեն արձանագրվել, հայտնում է Արցախի պաշտպանության նախարարությունը՝ նշելով՝ չնայած հարաբերական կայունությանը լարվածությունը պահպանվում է։
Նախարարությունը նշում է, որ որոշ ուղղություններում ադրբեջանական զինուժը կրկին խախտել է հրադադարի պահպանման ռեժիմը՝ կիրառելով տարբեր տրամաչափի հրաձգային զինատեսակներ։
«Ռուսական խաղաղապահ զորակազմի հետ միասին շարունակում են աշխատանքներ իրականացվել իրավիճակի հետագա կայունացման ուղղությամբ», - ասված է հաղորդագրությունում։
Պաշտպանության բանակը նաև հայտնում է, որ Ադրբեջանի պաշտպանության նախարարության տարածած հաղորդագրությունը, ըստ որի, Արցախի պաշտպանության բանակի ստորաբաժանումները խախտել են հրադադարի պահպանման ռեժիմը չի համապատասխանում իրականությանը:
Հայաստանի ռազմական գերատեսչությունը ևս հերքել է ադրբեջանական դիրքերը գնդակոծելու մասին Ադրբեջանի մեղադրանքները։
«Ադրբեջանի պաշտպանության նախարարությունը շարունակում է ապատեղեկատվություն տարածել, հայտարարելով, թե ՀՀ ԶՈւ ստորաբաժանումները նախորդ մի քանի օրերին գնդակոծել են հայ-ադրբեջանական սահմանի մի քանի ուղղությամբ տեղակայված ադրբեջանական դիրքերը: Իրադրությունը հայ-ադրբեջանական սահմանին հարաբերականորեն կայուն է, գտնվում է ՀՀ ԶՈՒ լիարժեք վերահսկողության ներքո», - ասված է հաղորդագրությունում:
Բաքուն հայտնել է, որ «վերջին մեկ օրվա ընթացքում հայկական զինված կազմավորումները, ընդհանուր առմամբ, 10 անգամ կրակել են ադրբեջանական դիրքերի ուղղությամբ»։
