Ռուսաստանի Դաշնության, Հայաստանի և Ադրբեջանի ղեկավարների հանդիպման նախապատրաստական աշխատանքները շարունակվում են, ստույգ պայմանավորվածություններ չկան։ Այս մասին հայտարարել է Ռուսաստանի նախագահի խոսնակ Դմիտրի Պեսկովը։
Ռուսաստանի և Ադրբեջանի նախագահների, Հայաստանի վարչապետի միջև տեսակոնֆերանսի ռեժիմով եռակողմ հանդիպման անցկացման ստույգ պայմանավորվածություն դեռ չկա, նշել է Կրեմլի խոսնակը։
«Պարզաբանեմ Պուտին, Ալիև և Փաշինյան տեսակոնֆերանսի թեման։ Իսկապես, մենք հաստատել ենք, որ աշխատանքներ են տարվում նման հանդիպման նախապատրաստման ուղղությամբ, սակայն այստեղ ուզում եմ նշել, որ մինչ այժմ ստույգ պայմանավորվածություններ և դրան վերաբերող փոխըմբռնում, թե երբ կարող է նման տեսակոնֆերանսը տեղի ունենալ, դեռ չկա », - երկուշաբթի օրը լրագրողներին ասել է Պեսկովը և հավելել, որ այդ ուղղությամբ աշխատանքը շարունակվում է։
Ավելի վաղ «Ռոսիա-1» հեռուստաընկերությունը հայտնել է, թե չի բացառվում Ռուսաստանի նախագահ Վլադիմիր Պուտինի մասնակցությամբ եռակողմ հանդիպում Ադրբեջանի և Հայաստանի առաջնորդների միջև՝ «նվիրված եռակողմ փաստաթղթի ստորագրման տարելիցին»։
Ավելի ուշ Պեսկովը հաստատել է այս շաբաթ Հայաստանի, Ադրբեջանի և Ռուսաստանի ղեկավարների եռակողմ հանդիպում նախապատրաստելու պլանները։
Ժամեր անց Հայաստանի վարչապետ Նիկոլ Փաշինյանը հայտարարել էր, թե այս պահին նոյեմբերի 9-ին հանդիպելու որևէ պայմանավորվածություն չկա։
