Երկուշաբթի օրվանից տեղաշարժման թերթիկներ լրացնելու անհրաժեշտություն չի լինելու։
Էկոնոմիկայի փոխնախարար Վարոս Սիմոնյանի փոխանցմամբ, թեև մարդկանց ազատ տեղաշարժի սահմանափակումները կհանվեն, սակայն հանրային տրանսպորտը կշարունակի չաշխատել։ Չի գործելու նաև միջմարզային տրանսպորտը:
Հարցին, թե ինչպես են քաղաքացիները տեղաշարժվելու, եթե հանրային տրանսպորտ չի գործելու փոխնախարարը պատասխանեց․ - «Հանրային տրանսպորտը դա շատ բարձր ռիսկային ունեցող տնտեսական գործունեության տեսակ է, որը թույլ է տալիս շատ արագ կերպով տարածել համավարակը»։
Հանվում են նաև սահմանափակումները տնտեսական գործունեության գրեթե բոլոր տեսակների վերաբերյալ, կշարունակեն փակ մնալ մոլերը։ Գրեթե չեն լինելու սահմանափակումներ մանրածախ ու մեծածախ առևտրում, բացվելու է մշակող արդյունաբերությունը՝ գործունեության բոլոր տեսակներով։ Կգործեն այն ռեստորաններն ու սրճարանները, որոնք կունենան բացօթյա տարածք:
Անհատական ծառայությունները, օրինակ՝ մաքրման ծառայությունների, վարսավիրանոցներ ի գործունեությունը ևս կթույլատրվի մայիսի 4-ից․ - «Սա կարելի է դիտարկել յուրահատուկ թեստի ձևով, որովհետև մենք գնում ենք սահմանափակումների թուլացմանը, բայց միևնույն ժամանակ բոլորս՝ թե՛ տնտեսվարողները, թե՛ քաղաքացիները պետք է ցուցաբերեն բարձր գիտակցություն և կարգապահություն։ Դրանից է կախված լինելու՝ մենք կշարունակե՞նք պահպանել մեղմ սահմանափակումների ռեժիմը, թե՞ վերադարձ ենք կատարելու ավելի խիստ սահմանափակումներին»։
Առողջապահության փոխնախարար Լենա Նանուշյանը հորդորում է բոլոր քաղաքացիներին ավելի պատասխանատու վերաբերվել անվտանգության կանոններին, որպեսզի սահմանափակումների մեղմացումը վարակակիրների թվի կտրուկ աճի չհանգեցնի։ Հիմնական պահանջներ են՝ աշխատավայրում պահպանել 1-2 մետր հեռավորություն միմյանցից և հաճախորդներից, պարբերաբար ախտահանել և օդափոխել տարածքը, պահպանել հիգիենայի կանոնները, մասնավորպես հաճախակի լվացվել, ինչպես նաև կրել դիմակներ․ - «Աշխատողները կամ հաճախորդները կունենան ջերմություն, անպայման որպեսզի լքեն աշխատավայրը և դիմեն անպայման բժշկի։ Մյուս կարևոր միջոցառումների շարքում է գտնվում խոցելի խմբերի՝ 65 տարեկան և բարձր անձանց, ինչպես նաև խրոնիկ հիվանդություններով տառապող անձանց հեռահար աշխատանքի կազմակերպումը հնարավորության դեպքում։ Սոցիալական դիստանցիայի պահպանման հետ կապված ասեմ, մեր տնտեսական գործունեությամբ զբաղվող կազմակերպությունները պետք է աշխատեն բացառել ժողովների անցկացումը կամ փոքրաթիվ քանակով կազմակերպեն՝ նորից ապահովելով սոցիալական հեռավորությունը։ Կարևոր նաև ուղղություն է տարբեր կազմակերպություններում սննդի ընդունման հետ կապված աշխատանքների կազմակերպումը՝ չթողնելով, որպեսզի մարդիկ կուտակումներով նույն վայրում ընդմիջում անեն, և անպայման ախտահանումներ իրականացնել այդ վայրերում»։
Յուրաքանչյուր տնտեսվարող պետք է նշանակի կորոնվիրուսի կանխարգելման կանոնների պահպանման համար պատասխանտուի անձի: Տնտեսվարողների նկատմամբ հիմնական վերահսկողությունը կիրականցնի Առողջապահական և աշխատանքի տեսչական մարմինը:
«Երբ որ մենք գնում ենք թուլացմանը, միևնույն ժամանակ ավելի ենք ուժեղացնում հսկողությունը։ Դրա համար առանձնացվել են կոնկրետ ոլորտներ, որոնք արդեն իսկ կթույլատրվեն, և դրանց վերաբերյալ հստակ ուղեցույցներով հստակ կանոններ են սահմանված», - փոխանցեց Վարոս Սիմոնյանը։
Առողջապահության փոխնախարարի խոսքով, դժվար է հաշվարկել, թե վարակակիրների թվի փոփոխության առումով ինչ հետևանքերի կբերի սահմանփակումների հանումը, բայց շտապում են ավելացնել, որ մշտադիտարկումը շարունակվում է և եթե հասկանան, որը հին սահմանափակումներին վերադառնալու կարիք կա միանգամից կգնան այդ ճանապարհով:
