«Ժառանգություն» խմբակցության ղեկավար Ռուբիկ Հակոբյանն այսօր լրագրողների հետ հանդիպման ընթացքում տեղեկացրեց, որ եռյակում Սերժ Սարգսյանի հետ առանձին-առանձին չհանդիպելու պայմանավորվածություն է եղել:
Հակոբյանն ասաց, որ մինչև հիմա Ծառուկյանից լուր չունեն, չգիտեն, թե ինչու խախտեց պայմանավորվածությունը:
Հակոբյանը, սակայն, ասաց, թե ուզում է գաղտնիք բացել․ - «Մենք պայմանավորվածություն ունեինք, որ եթե Սերժ Սարգսյանի հետ հանդիպում պետք է լինի, որտեղ պետք է քննարկվեն այս քաղաքական գործընթացները, որ ծավալվել են նաև երեք քաղաքական ուժերի ղեկավարությամբ, այդ հանդիպմանը պետք է մասնակցեն հենց այդ երեք քաղաքական ուժերի ներկայացուցիչները: Ես չգիտեմ ինչու դա տեղի չունեցավ: Գուցե հնարավորություն չի՞ ունեցել նաև մեզ տեղեկացնելու: Որովհետև ես գոնե հետևանքների առումով կարող եմ դատել, որ բռնություններ են իրականացվել»:
Ռուբիկ Հակոբյանը չի կարծում, թե իշխանությունը արյունահեղություն կաներ․ 2008-ից հետո որևէ իշխանություն իրեն թույլ չէր տա Մարտի 1-ի կրկնություն:
«Ժառանգության» ներկայացուցչի խոսքով՝ Ծառուկյանի վրա ընդամենը հոգեբանական գրոհ է եղել․ - «Քաղաքական մեծամասնությունը այդպես էլ չգիտակցեց, որ ցուցմունք տվեց: Ցուցմունքը հետևյալն է․ մենք արյունահեղություն ենք անելու՝ եթե դուք հավաքվեք Ազատության հրապարակում: Հասկանալի է, որ ընդդիմությունը չէ, որ զենքով կգար Ազատության հրապարակ: Ես վստահ եմ, որ դա հոգեբանական գրոհ էր: Ուղղակի նրանք չգիտակցեցին, որ իրենց ասում են՝ մենք արյուն կհեղենք: Բայց ես կարծում եմ, դա ավելի շատ ընդամենը հոգեբանական գրոհ էր, որովհետև չեմ կարծում, որ իշխանությունը արյունահեղություն կաներ»:
Ազգային ժողովի փոխնախագահ Հերմինե Նաղդալյանը, սակայն, հավատացնում է, թե Հանրապետականը որևէ մեկին արյունահեղությամբ չի սպառնացել՝ պահանջելով փաստեր․ - «Տենց բաներ չի եղել, որևէ մեկը չի լսել տենց խոսքեր․․․ Հանրապետականը երբևէ որևէ արյունահեղության կամ նման այլ տերմին կամ տերմինաբանություն չի օգտագործել»:
Հիշեցնեմ, համաժողովրդական հանրահավաքը չեղյալ հայտարարած ուժի՝ «Բարգավաճ Հայաստան»-ի ղեկավար Գագիկ Ծառուկյանը տարածած հայտարարության տեքստում, մասնավորապես, նկատել էր․ - «Ինձ համար թանկ է մեր քաղաքացիներից յուրաքանչյուրի կյանքն ու արժանապատվությունը: Ոչ մի նպատակ չի կարող արդարացնել նույնիսկ մեկ անմեղ մարդու արյուն: Թե՛ իշխանության, թե՛ ընդդիմության խնդիրն է չանցնելողջամտության սահմանը: Բոլոր խնդիրները պետք է լուծվեն խաղաղ, օրինական, քաղաքական ճանապարհով»:
Ընդդիմությանն ու իշխանությանը հեռանալու կոչ անող անկախ պատգամավոր Էդմոն Մարուքյանը դեռ վաղ է համարում գնահատել ԲՀԿ-ի շուրջ ընթացող գործընթացները:
«Արյունահեղությամբ սպառնալիքի մասին ես որևէ փաստ չունեմ: Սա մեկ: Եվ այդ փաստի մասին ոչ ոք այսօր չի խոսում: Սա երկու: Եվ երրորդը, ես կարծում եմ, որ այսօր բավականին քաղաքացիական ազատություններ կան Հայաստանում, և ամեն ինչ համեմատության մեջ է: Եվ ես կարծում եմ, որ եթե նորմալ մարդիկ սկսեն զբաղվել քաղաքականությամբ, և ոչ թե նորմալ մարդկանց քֆրտեն-հանեն քաղաքական դաշտից, ապա, այո, այսօրվա եղած իշխանության օրոք էլ հնարավոր է ձևավորել նորմալ քաղաքական ուժեր»:
Հերմինե Նաղդալյանի խոսքով՝ քաղաքական դաշտը մաքրելը մեկ օրվա գործ չէ, ուստի Սերժ Սարգսյանի հայտարարած «քաղաքական դաշտը քաղաքական գործիչներին թողնելու» գործընթացը ավարտված չէ:
Հարցին, թե գործարարությամբ զբաղվող քանի Հանրապետական է դուրս եկել կուսակցությունից և խմբակցությունից, Նաղդալյանը արձագանքեց, թե նրանք օրենք չեն խախտում, նրանց փաստաթղթերը կարգին են, բիզնեսները՝ հավատարմագրային կառավարման հանձնված:
Հանրապետականին, մինչդեռ, շարունակում է անհանգստացնել Ազգային ժողովի փոխնախագահի ձևակերպմամբ՝ ընդդիմադիր բևեռի վիճակը․ - «Լավ, ինչ-որ արժեքավոր բան ծնվում է հանունից, ընդդեմից որևէ բան չի կարող ծնվել և առաջանալ: Կարծում եմ, որ այսօր ընդդիմադիր դաշտի հիմնական խնդիրը սրանում է»:
«Ժառանգություն» խմբակցության ներկայացուցիչ Ռուբիկ Հակոբյանը չի թաքցնում՝ այս պահին ընդդիմությունը միասնական ծրագրեր չունի, քայլերը վերաձևակերպելու խնդիր ունի: Բայց գործընթացը, կարծում է ընդդիմադիր միասնական հարթակի կողմնակից Հակոբյանը, շատ երկար չի տևի․ - «Շոկային վիճակ կա այսօր ընդդիմության դաշտում: Այս թվացվալ լռության մեջ մեծ ճիչ կա, մեծ աղմուկ կա: Սա կայունություն չի: Եվ շատ արագ, ես վստահ եմ, որ նորից քաղաքական դաշտը իր ասելիքը կասի, հատկապես ընդդիմադիր դաշտը: Երբ ասում եմ ընդդիմադիր դաշտ, նախ և առաջ ժողովրդին նկատի ունեմ»:
