Ազգային ժողովի նախագահ Գալուստ Սահակյանը, ըստ էության, անպատասխան թողեց Սյունիքի մարզպետի պաշտոնում Սուրիկ Խաչատրյանին վերանշանակելու մասին ՀԱԿ խմբակցության անդամ Նիկոլ Փաշինյանի հարցը:
Հերթական քառօրյայի առաջին նիստում ընդդիմադիր պատգամավորն իր հարցը ձևակերպեց շատ կոնկրետ. - «Սյունեցիներից մեկին ոչնչացրածին վերստին նշանակելով մարզպետ` կարո՞ղ ենք արձանագրել, դուք նրան Կառավարության որոշման մակարդակով տալիս եք Սյունիքում, Հայաստանի այլ տարածքներում սպանություններ և այլ լկտիություններ կատարելու արտոնագիր»:
Գալուստ Սահակյանի արձագանքը. - «Երբ որ կարողանաք Ազգային ժողովին լիազորություններ տալ դատաիրավական, քննչական գործողությունների, այդ հարցը կարող եք ուղղել Ազգային ժողովին: Իսկ եթե հնչեցնում եք ժողովուրդը լսելու համար, արդեն իսկ հնչեցրեցիք»:
Փաշինյանի նախագիծը մերժվեց
Ազգային ժողովն այսօր մերժեց քննարկել սահմանապահ համայնքների համար լայն արտոնություններ նախատեսող` Նիկոլ Փաշինյանը նախագիծը:
Արտոնություններից պետք է օգտվեր 40 համայնք՝ ներառյալ Ադրբեջանին սահմանակիցները:
Այսօրվա քվեարկությունից հետո նախագիծն անգամ քննարկման փուլ չի անցնի: Չփրկեցին անգամ Փաշինյանի հավաստիացումները, թե կարող է համահեղինակ դարձնել բոլոր խմբակցություններին:
«Նախընտրելի նախագիծ է, բայց քաղաքական վեց խմբակցություններ իրենց առաջարկություններով դիմել են Կառավարությանը, այդ առաջարկությունները ավելի համապարփակ կլինեն: Այնպես որ, թող չթվա, որ մարդիկ կան Ազգային ժողովում, որոնք դեմ են արտոնություն տալ սահմանապահ շրջաններին», - ասաց Գալուստ Սահակյանը:
«Ինքս նախորդ չորեքշաբթի մասնակցել եմ վարչապետի որոշմամբ ստեղծված աշխատանքային խմբի նիստին, որտեղ նախատեսվում էր սահմանամերձ համայնքների հարցերը քննարկել, և կարող եմ հաստատել, որ սրան համարժեք նախագիծ ստեղծելու հարց առայժմ, ցավոք սրտի, Կառավարության օրակարգում չկա», - ի պատասխան ասաց Նիկոլ Փաշինյանը:
Իշխանության տեսակետին ընդդիմացան կանայք՝ «Ժառանգություն»-ից Զարուհի Փոստանջյանն ու ՕԵԿ-ից Հեղինե Բիշարյանը:
Փոստանջյանը պնդեց, որ նման օրենքի անհրաժեշտությունն այսօր «շատ հրատապ է». - «Մենք իրավունք չունենք սպասելու Կառավարությանը, որպեսզի Կառավարությունը փաթեթով օրենքներ բերի»:
«Ինչո՞ւ պետք է անընդհատ մենք աջակցենք, ոչ թե մեզ աջակցեն», - ասաց Բիշարյանը:
Խորհրդարանականների կարծիքները կիսվեցին. անգամ հանրապետականների շարքերում գտնվեցին պատգամավորներ` Մհեր Սեդրակյանը, Կարեն Կարապետյանը և այլոք, ովքեր կողմ էին Փաշինյանի նախաձեռնությանը: Ավելի շատ էին, սակայն, չքվեարկողներն ու ձեռնպահ մնացածները: Այդ հարցում Հանրապետականի կարծիքը կիսեցին նաև ոչ իշխանական ԲՀԿ-ի շատ ներկայացուցիչներ:
Գալուստ Սահակյանը Նիկոլ Փաշինյանին հորդորեց չվիրավորվել:
Այնուհետև Զարուհի Փոստանջյանը հետաքրքրվեց հայ-թուրքական արձանագրությունների ճակատագրով․ ե՞րբ է նախագահը խորհրդարանից հետ կանչելու դրանք․ - «Սերժ Սարգսյանը ՄԱԿ-ի ամբիոնից հայտարարեց, որ հայ-թուրքական արձանագրությունները պետք է ուղարկել գրողի ծոցը: Հայաստանի Հանրապետության Ազգային ժողովը այդ վայրը չէ, «գրողի ծոցը» չէ, թեպետ կարելի է նաև պնդումներ անել, որ այստեղ «գրողի ծոցը» հասկացությունը իրականությանը համապատասխանում է, քանի որ այստեղ են սպանվել մեր երկրի ղեկավարները․․․»
Պատգամավորին ընդհատեց նիստը վարող ԱԺ փոխնախագահ Շարմազանովը՝ խնդրելով «պահպանել քաղաքական կոռեկտություն և խոսել բացառապես օրակարգի վերաբերյալ»:
«Պարոն Շարմազանով, «գրողի ծոց» բառակապակցությունը, որը հեղինակային իրավունքով հնչել է ՄԱԿ-ի ամբիոնից, օգտագործվել է ձեր կուսակցության ղեկավարի կողմից, որը այստեղ մեջբերվում է․․․», - արձագանքեց Փոստանջյանը, սակայն չկարողացավ ավարտին հասցնել խոսքը, քանի որ Շարմազանովի հրահանգով նրա խոսափողն անջատվեց:
Մինչև օրակարգային հարցերին անցնելը դահլիճն անվերահսկելի դարձավ: Քվեարկում էին «Արտոնագրային վճարների մասին» օրենքում «Բարգավաճ Հայաստան»-ի պատգամավորների հեղինակած փոփոխությունների նախագիծն օրակարգում ընդգրկելու հարցը: Շարմազանովը հայտարարեց, թե գործընկերների մի մասին չի հաջողվել ճիշտ քվեարկել (խոսքը թերևս դեմ արտահայտվելու մասին էր) և որոշեց հարցը նորից դնել քվեարկության:
Չնայած նախագիծը մերժվել էր, ԲՀԿ-ն ընդդիմացավ: Տիգրան Ուրիխանյանը ասաց․ - «Հարգելի նիստը նախագահող, խնդրում եմ հիմնավորեք կրկնակի քվեարկությունը: Հիմնավորեք»:
Այդ ժամանակ Շարմազանովն ասաց․ - «Վերաքվեարկության խնդիր չկա․ կողմ 47, դեմ 42, ձեռնպահ 3: Որոշումը չի ընդունվել»:
