Սյունիքի նախկին մարզպետ Սուրիկ Խաչատրյանի տան մոտ տեղի ունեցած Ավետիք Բուդաղյանի սպանությունից հետո նրա գնդապետ եղբոր դեմ հարուցված քրեական գործով այսօր Գորիսի դատարան է ներկայացել Սուրիկ Խաչատրյանի տիկինը՝ Լորետա Բարսեղյանը՝ տուժողի կարգավիճակում:
Գորիսում դատավարությանը հետևող լրագրող Մերի Սողոմոնյանի փոխանցմամբ, դատավոր Նապոլեոն Օհանյանը նիստին ներկա լրագրողներին արգելել է տեսագրել նախկին մարզպետի տիկնոջը, թեև դատական նիստը բաց է և հրապարակային:
Սուրիկ Խաչատրյանի 20-ամյա որդին՝ Տիգրան Խաչատրյանը, այսօր դատարան չի ներկայացել: Նա կալանավորվել էր Գորիսի քաղաքապետի նախկին թեկնածու, 43-ամյա գործարար Ավետիք Բուդաղյանի սպանության մեղադրանքով, սակայն իրավապահները որոշում էին կայացրել նրա նկատմամբ քրեական հետապնդումը դադարեցնելու մասին: Այժմ Տիգրան Խաչատրյանը այս գործով վկայի կարգավիճակ ունի: Տիգրան Խաչատրյանի մայրը՝ տուժող ճանաչված Լորետա Բարսեղյանը, դատարանին հստակ տեղեկություն չի հայտնել, թե որտեղ է որդին:
Բուդաղյանների փաստաբան Հայկ Ալումյանը դատարանի ուշադրությունն է հրավիրել Լորետա Բարսեղյանի գրավոր բացատրությանը: Լորետա Բարսեղյանին հարց է ուղղել դատավորը՝ «չի՞ ասել, Հայաստանի Հանրապետությունից բացակայում է արդյոք, թե՞ ոչ»:
«Նրա անվտանգությունից ելնելով ես չեմ կարող ասել», - պատասխանել է Լորետա Բարսեղյանը:
Բուդաղյանների փաստաբան Հայկ Ալումյանը պնդել է Սուրիկ Խաչատրյանի որդուն հարցաքննելու միջնորդությունը: Դատավոր Նապոլեոն Օհանյանը պատասխանել է, թե՝ «ոստիկանության պետին մենք նախազգուշացրել ենք, որ բերման որոշումն ուժի մեջ է»:
Անցյալ տարի նախկին մարզպետի տան մոտ Ավետիք Բուդաղյանի սպանությունից հետո նրա եղբորը՝ գնդապետ Արտակ Բուդաղյանին, մեղադրանք էր առաջադրվել: Նախաքննական մարմինն ապացուցված էր համարել, թե Արտակ Բուդաղյանը, տեղեկանալով, որ Սուրիկ Խաչատրյանի ավտոմեքենայում ծեծել են Ավետիք Բուդաղյանին, և «նպատակ ունենալով վախեցնել Սուրիկ Խաչատրյանին և նրա ընտանիքի անդամներին, նրանց մոտ առաջացնել տագնապի, սեփական անվտանգության համար անհանգստության զգացում», Սուրիկ Խաչատրյանի առանձնատան մոտ որսորդական հրացանը ձեռքին իջնելով ավտոմեքենայից սպանության սպառնալիքներ է տվել Սուրեն Խաչատրյանի և նրա հարազատների հասցեին: Իսկ սպանության մեջ մեղադրվող Տիգրան Խաչատրյանը և նախկին մարզպետի թիկնապահը դարձան վկա:
Դատարանն այսօր քննարկել է անցյալ տարվա հունիսի 1-ին վիրավորված նախկին մարզպետ Սուրիկ Խաչատրյանի օգնական, 39-ամյա Նիկոլայ Աբրահամյանի կարգավիճակը: Տուժող համարվող Լորետա Բարսեղյանի ներկայացուցիչ, փաստաբանների պալատի նախկին անդամ Ռուբեն Սահակյանն անդրադարձել է, իր բառով, այս քրեական գործի «աբսուրդ» իրավիճակին:
«Նիկոլայ Աբրահամյանը այս գործով որպես տուժող չի ճանաչվել», - ասել է նա:
Բուդաղյանների փաստաբան Հայկ Ալումյանն անդրադարձել է քրեական գործում տուժող և մեղադրվող կողմերի փոփոխությանը․ - «Բայց այդ աբսուրդը, որ այսօր ունենք, ուղղակի հետևանք է այն աբսուրդին, որը տեղի է ունեցել նախաքննության ընթացքում: Երբ մարդիկ կային, որոնք քրեական գործով անցնում էին որպես մեղադրյալ, հանկարծ ազատվեցին քրեական պատասխանատվությունից, իսկ մարդը, որը քրեական գործով պիտի լիներ տուժող, հանկարծ դարձավ մեղադրյալ, հետո էլ ամբաստանյալ»:
Դատարանն այսօր հետազոտել է գործին կցված տեսանյութերը: Հաջորդ դատական նիստին՝ հոկտեմբերի 2-ին, նախատեսվում է հետազոտել ձայնագրություն, որտեղ Սուրիկ Խաչատրյանի կինը՝ Լորետա Բարսեղյանն, ըստ արձանագրության, որդուն հանդիմանում է սպանության համար:
