Выстава арганізаваная суполкай “Пагоня” і сябрамі камісіі на культуры партыі БНФ.
Выстава адкрылася ў дзень народзінаў нацыянальнага героя Беларусі, аднаго з кіраўнікоў паўстаньня 1863 года, рэвалюцыянэра-дэмакрата, публіцыста Кастуся Каліноўскага. А 4 лютага – 200-годзьдзе выбітнага беларускага пісьменьніка, драматурга Дуніна-Марцінкевіча.
Распавядае мастак Аляксей Марачкін:
“Мы павінны памятаць пра наша слаўнае мінулае і асабліва пра такіх волатаў Адраджэньня, волатаў у змаганьні за Беларусь супраць русыфікацыі, супраць гвалту, супраць прыгнёту. Вось гэтыя дзьве фігуры вельмі важныя для нас. Паколькі заля тут невялікая, прадстаўленыя творы Міколы Купавы – вельмі цікавы цыкль яго лінарытаў, прысьвечаных паўстаньню 1863 года, творы, прысьвечаныя Дуніну-Марцінкевічу. Цікавыя творы Алеся Цыркунова”.
Выстаўленыя працы самога Аляксея Марачкіна. Асабліва ўражвае вялікі парадны партрэт Дуніна-Марцынкевіча, напісаны алеем у 1983 годзе. На выставе дэманструюцца таксама плякаты Ўладзімера Крукоўскага, палотны Міхася Карпука, Тодара Ладуцькі.
Мастак Алесь Цыркуноў выставіў два сваіх творы: “Люстэрка” – (прысьвячэньне Эдварду Яну Ромэру, грамадзкаму дзеячу, літаратару, перакладчыку і мастаку) і “Пакліканыя і ўтрапёныя прадвечнаю воляй” -- прысьвячэньне Кастусю Каліноўскаму. Мастак прызнаецца, што хацеў невялікім па памерах творам ахапіць увесь арэал таго ваяўнічага пэрыяду:
“Па пэрымэтры – выявы паўстанцаў, паўсотні прыкладна партрэтаў. Кампазыцыя па форме сваёй мае крыж з бел-чырвона-белай асновай. У цэнтры крыжа – выява кіраўніка паўстаньня Кастуся Каліноўскага. Чатыры выявы, якія па баках – тых дзеячаў, якія жылі пазьней і адлюстравалі кожны ў сваёй галіне вобраз правадыра паўстаньня. У жывапісе – там малады Пётра Сергіевіч, у паэзіі – Максім Танк, у прозе, драматургіі – Уладзімер Караткевіч, у навуковых дасьледаваньнях – Генадзь Кісялёў”.
Сёньня ў сядзібе БНФ ладзіцца вечарына, прысьвечаная 170-м угодкам Кастуся Каліноўскага, з удзелам хору “Унія” і барда Эдуарда Акуліна.
