Паводле яе слоў, якія перадае партал Delfi, мэтэазонды з Беларусі «мэтанакіравана былі накіраваныя ў бок аэрапорта». «Мы гаворым, што сёньня бачым, што можам адкрыць межы, але не выключаем магчымасьці паўторнага закрыцьця межаў на нявызначаны тэрмін, калі сытуацыя зьменіцца ў горшы бок», — сказала Ругінене.
Прэмʼерка адзначыла, што мэтэазонды сталі для Літвы «новай рэальнасьцю». Аднак, «перабудаваўшы альгарытмы», літоўскі бок «усё радзей» закрывае аэрапорты, дадала яна.
«Я ясна дала зразумець учора і пазаўчора: адным толькі адкрыцьцём або закрыцьцём мы рэзка не адключым мэтэазонды. Кожны раз, калі мы гаворым аб гэтым пытаньні, ёсьць шмат стратэгічных дзеяньняў», — падкрэсьліла кіраўніца ўраду Літвы.
Пункты пропуску Мядзінінкай і Шальчынінкай на літоўска-беларускай мяжы аднавілі працу апоўначы 20 лістапада.
Вільня закрыла памежныя пераходы ў канцы кастрычніка, дамагаючыся такім чынам рэакцыі Менска на масавыя прылёты з Беларусі паветраных балёнаў з кантрабандай, якія перашкаджалі ў тым ліку цывільнай авіяцыі Літвы.
Пры гэтым пасьля адкрыцьця мяжы зафіксаваны новы інцыдэнт, з-за якога часова закрываўся аэрапорт Вільні.
Форум