Прысуд вядомаму бізнэсоўцу пакінулі нязьменным
У праваабарончым цэнтры «Вясна» паведамілі, што 28 кастрычніка Вярхоўны суд Беларусі пакінуў бязь зьменаў завочны вырак суўладальніку Wargaming Мікалаю Кацалапаву — яго апэляцыйную скаргу не задаволілі.
У верасьні 2025 году Мікалая Кацалапава завочна асудзілі на 13 гадоў пазбаўленьня волі з спагнаньнем штрафу ў 50 тысяч базавых велічыняў (2 мільёны 100 тысяч рублёў). Справу разглядалі ў гарадзкім судзе Менску. Вядомаму прадпрымальніку інкрымінавалі ч. 1 і 2 арт. 361-2 Крымінальнага кодэксу («фінансаваньне экстрэмісцкай дзейнасьці») і ч. 2 арт. 290-1 («фінансаваньне тэрарыстычнай дзейнасьці»).
Яшчэ ў студзені 2023 Мікалая Кацалапава ўключылі ў сьпіс «тэрарыстаў». Вядомы беларускі бізнэсовец на той момант ужо жыў за мяжой.
Выкладчыцу ўнівэрсытэту асудзілі на зьняволеньне
У Гомельскім абласным судзе асудзілі выкладчыцу Гомельскага дзяржаўнага мэдычнага ўнівэрсытэту Галіну Латугоўскую, прысуд зьвязаны з пазбаўленьнем волі, паведамілі праваабаронцы.
Выкладчыцу судзілі паводле шасьці артыкулаў Крымінальнага кодэксу: ч. 3 арт. 361‑1 («уваходжаньне ў склад экстрэмісцкага фармаваньня»), ч. 1 і 2 арт. 361-4 («садзейнічаньне экстрэмісцкай дзейнасьці»), ч. 1 і 2 арт. 367 («паклёп на Лукашэнку»), ч. 1 арт. 368 К («абраза Лукашэнкі»), арт. 369 («абраза прадстаўніка ўлады») і арт. 369‑1 («дыскрэдытацыя Беларусі»).
Галіне Латугоўскай 47 гадоў. Яна працавала выкладчыцай на катэдры агульнай і біяарганічнай хіміі ГДМУ. Паводле зьвестак праваабаронцаў, вынесены Латугоўскай прысуд зьвязаны з пазбаўленьнем волі, але тэрмін зьняволеньня пакуль невядомы. У кастрычніку 2025 году Галіну Латугоўскую ўключылі ў сьпіс «экстрэмістаў,» беларускія праваабаронцы прызналі яе палітычнай зьняволенай.
Старонку Сяргея Ціханоўскага ў TikTok прызналі «экстрэмісцкаю»
Такое рашэньне прыняў 23 кастрычніка суд Смалявіцкага раёну, паведаміла «Вясна».
Паводле праваабаронцаў, «экстрэмісцкі» сьпіс папоўнілі таксама TikTok-старонка «volyabela» і старонка ў Threads «free_zhlobin».
Форум