Экспэрты Арганізацыі Аб’яднаных Нацыяў выказалі трывогу ўсплёскам колькасьці сьмяротных пакараньняў у Іране.
У пятніцу 29 жніўня ў ААН асудзілі Іран за «сыстэматычнае выкарыстаньне сьмяротнага пакараньня як інструмэнту дзяржаўнага запалохваньня».
ААН паведаміла, што з пачатку году ў Іране пакараны сьмерцю прынамсі 841 чалавек.
«Толькі ў ліпені іранскія ўлады пакаралі сьмерцю 110 чалавек. Гэта больш чым удвая перавышае колькасьць пакараных сьмерцю ў ліпені летась і адбываецца пасьля значнага росту колькасьці пакараньняў сьмерцю ў першай палове 2025 году», — заявіла журналістам у Жэнэве прэс-сакратар Офісу правоў чалавека ААН Равіна Шамдасані, піша AFP.
Летась з пачатку году да жніўня сьмяротных пакараньняў у Іране было больш за 400, такім чынам сёлета іх пабольшала ўдвая.
Паводле інфармацыі праваабаронцаў, у тым ліку Amnesty International, колькасьцю пакараньняў сьмерцю ў год Іран саступае толькі Кітаю. «Пакараньне сьмерцю за злачынствы, зьвязаныя з наркотыкамі, парушае міжнародныя стандарты», — заявілі яны.
Судовыя працэсы ў Іране, якія завяршаюцца сьмяротнымі прысудамі, часта не адпавядаюць гарантыям належнай праўнай працэдуры.
