Беларускія ўлады не адпускаюць грамадзяніна ЗША і Чэхіі Антона Роса, які цярпіць ад страты памяці і якога раней шукала маці.
У сакавіку 2025 году Антон Рос нелегальна прыехаў у Беларусь зь Літвы ў грузавым вагоне цягніка. Меркавана, на яго завялі крымінальную справу, паведаміла рэдакцыі Reform.news маці Антона.
Па словах жанчыны, 2 красавіка яна спрабавала трапіць у Беларусь з боку Літвы, каб забраць сына, але беларускія памежнікі яе не прапусьцілі.
«Я ехала туды 2 красавіка, але мяне вярнулі беларусы на мяжы», — распавяла яна Reform.news.
14 красавіка да затрыманага Антона Роса ня змог трапіць наняты адвакат. У той жа дзень жанчыне стала вядома, што Антона перавялі ў цэнтральны апарат СК.
«Вось абяцалі дэпартаваць хлопца, і СМІ раструбілі. Я чакала-чакала, і мне сказалі, што перавялі сына ў цэнтральны апарат Сьледчага камітэту Рэспублікі Беларусь. Гэта значыць захацелі крымінальную [справу] зварганіць, хворага чалавека не адпусьціць, а дамучыць, зламаць. Завошта? Што хацеў у Беларусь. Хаця і нелегальна, палюбіў, хацеў даехаць і пажыць, сказаў жа ў камэру, як палюбіў краіну... І што далей? Хлопец хворы, ёсьць страта памяці, дэзарыентацыя. Нашто ім ён?», — распавяла маці хлопца.
Жанчына падкрэсьлівае, што Антон Рос цярпіць ад страты памяці і мае патрэбу ў лекаваньні.
«Завошта? Было адміністрацыйнае пакараньне і рашэньне аб дэпартацыі, штраф я праплаціла. Чаму не дэпартавалі, каб я магла лячыць сына ў Празе, дзе ён жыве па мэдыцынскай страхоўцы?», — кажа яна.
Яна зьвярнулася з просьбай да беларускіх уладаў:
«Адпусьціце, калі ласка, сына! Дома яму будзе лепей! Бо ўжо пакаралі адміністрацыйна, што яшчэ і крымінальна за адно і тое ж дзеяньне?»
- Антона Роса затрымалі 31 сакавіка 2025 году на чыгуначнай станцыі Маладэчна: ён ехаў зь Літвы ў адным з парожніх вагонаў таварнага цягніка. Яго абвінавацілі ў незаконным перасячэньні мяжы і прызначылі адміністрацыйнае пакараньне ў выглядзе штрафу. Маці хлопца Ларыса Рос паведаміла рэдакцыі Reform.news, што аплаціла штраф і выдаткі на ўтрыманьне сына ў беларускай установе, аднак дэпартацыя так і не адбылася.
- На наступны дзень, 1 красавіка, Дзяржаўны мытны камітэт Беларусі расказаў падрабязнасьці: паводле ведамства, мужчына 24 сакавіка двойчы спрабаваў уехаць на тэрыторыю Беларусі: раніцай праз пункт пропуску Каменны Лог (Меднікі зь літоўскага боку мяжы), а ўвечары таго ж дня — праз памежны пераход Беняконі (Салечнікі). Падчас памежнага кантролю ён ня змог пацьвердзіць наяўнасьць сродкаў для пакрыцьця выдаткаў на яго знаходжаньне ў Беларусі і выезд з краіны, таму яму адмовілі ва ўезьдзе, паведамілі ў Памежным камітэце.
- У Дзяржаўным мытным камітэце паведамілі, што пасьля прыцягненьня да адміністрацыйнай адказнасьці за незаконнае перасячэньне мяжы амэрыканца дэпартуюць на тэрыторыю Літвы, удакладнілі ў ведамстве.
- Пазьней высьветлілася, хлопца з 21 сакавіка 2025 года шукае маці. Антон цярпіць ад страты памяці. Апошні раз яго бачылі ў Цюрыху, тады ён спрабаваў паляцець у Хургаду.
- Увечары 3 красавіка беларуская прапаганда паказала Антона Роса па дзяржаўнай тэлевізіі. У сюжэце мужчына кажа, што хацеў бы застацца ў Беларусі.
