Мэр Адэсы Генадзь Труханаў напісаў, што адзін з дронаў трапіў па жылой забудове ў густанаселеным раёне горада — многія кватэры пашкоджаныя. «Жыхары прыходзяць у сябе ад шоку», — дадаў ён.
Паводле Труханава, на месцы ўзьнік пажар, на месцах працуюць апэратыўныя і камунальныя службы.
Кіраўнік Адэскай абласной ваеннай адміністрацыі Алег Кіпер піша, што мэдыцынскія работнікі надаюць пацярпелым неабходную дапамогу. Паводле папярэдніх зьвестак, гаворка ідзе пра трох пацярпелых. Такія ж зьвесткі прыводзяць і ратавальнікі.
Расейскія вайскоўцы таксама білі па Адэсе і Адэскай вобласьці ў Вялікдзень 20 красавіка. Тады, паводле кіраўніка Адэскай абласной ваеннай адміністрацыі Алега Кіпера, пацярпелі тры чалавекі, у тым ліку непаўналетнія.
Расейскія вайскоўцы рэгулярна з розных відаў узбраеньня атакуюць украінскія рэгіёны.
Кіраўніцтва Расеі адмаўляе, што расейскае войска падчас поўнамаштабнай вайны наносіць мэтанакіраваныя ўдары па цывільнай інфраструктуры гарадоў і вёсак Украіны, забіваючы мірных жыхароў і разбураючы лякарні, школы, дзіцячыя сады, аб’екты энэргетыкі і водазабесьпячэньня.
Украінскія ўлады і міжнародныя арганізацыі кваліфікуюць гэтыя ўдары як ваенныя злачынствы Расеі і падкрэсьліваюць, што яны маюць мэтанакіраваны характар.
У ААН змаглі пацьвердзіць, што з пачатку году ва Ўкраіне загінулі 413 цывільных асобаў, а больш за 2000 параненыя. У першыя тры месяцы 2025 году ахвяраў пабольшала на 30% у параўнаньні з аналягічным пэрыядам летась.
Форум