У Рыме пачаўся другі раўнд перамоваў паміж ЗША і Іранам па ядзернай праграме Тэгерана

Першы раўнд ядзерных перамоваў ЗША і Ірана прайшоў у Амане 12 красавіка, другі пачаўся 19 красавіка ў Рыме ў амбасадзе Аману.

Спэцпасланьнік Белага дома Стыў Уіткаф і міністар замежных спраў Ірана Абас Аракчы ўзначалілі свае дэлегацыі на перамовах у Рыме. Яны будуць весьці перамовы ўскосна праз аманскага чыноўніка, які будзе перадаваць паведамленьні паміж двума бакамі.

«Тэгеран разумее, што гэта ня гладкі шлях, але мы робім кожны крок з адкрытымі вачыма, таксама абапіраючыся на мінулы досьвед», — заявіў прэс-сакратар МЗС Ірана Эсмаіл Бакаі ў паведамленьні ў сацсетцы X напярэдадні сустрэч.

Кіраўнік МЗС Ірана заклікаў Расею падтрымаць ядзерныя перамовы. А дзяржсакратар ЗША Марка Рубіё выказаў надзею, што іранскія перамовы будуць «плённымі».

Reuters: Ізраіль можа атакаваць ядзерныя аб’екты ў Іране ў бліжэйшыя месяцы

Тым часам стала вядома, што Ізраіль можа нанесьці ўдар па ядзерных абʼектах Ірана ў найбліжэйшыя месяцы, нягледзячы на пазыцыю ЗША, паведамляе Reuters са спасылкай на свае крыніцы.

Паводле агенцтва, прэзыдэнт ЗША Дональд Трамп заявіў прэмʼер-міністру Ізраіля Біньяміну Нетаньягу, што Вашынгтон пакуль не гатовы падтрымаць такую апэрацыю, аддаючы перавагу дыпляматычнаму шляху. Тым не менш, Ізраіль надаў адміністрацыі ЗША варыянты нападу, у тым ліку авіяўдары і наземныя апэрацыі, разьлічаныя на канец вясны і лета. Цяпер, па словах крыніц, абмяркоўваецца больш абмежаваны сцэнар, які не патрабуе актыўнай падтрымкі ЗША.

Раней Ізраіль прапаноўваў аналягічныя пляны камандзе былога прэзыдэнта ЗША Джо Байдэна — амаль усе прадугледжвалі ўдзел ЗША ў выглядзе ваеннай падтрымкі або абмену зьвесткамі выведкі.

Выданне The New York Times паведамляла, што Ізраіль плянаваў удар па ядзерных абʼектах Ірана ў траўні, але адмовіўся з-за пазыцыі Трампа. Паводле інфармацыі The Washington Post, дарадца прэзыдэнта ЗША па нацбясьпецы Майкл Уолтц і дзяржсакратар Марка Рубіё выступаюць за сілавое рашэньне іранскага ядзернага пытаньня. Віцэ-прэзыдэнт Джэй Д. Вэнс і кіраўнікца выведкі Талсі Габард папярэджваюць аб рызыках рэгіянальнай вайны і адсутнасьці прыкмет, што Іран імкнецца да стварэньня ядзернай зброі.

Трамп, паводле інфармацыі The Washington Post, улічвае меркаваньні абодвух бакоў.

ГЛЯДЗІЦЕ ТАКСАМА:

ЗША і Іран дамовіліся сустрэцца на наступным тыдні пасьля «канструктыўных» перамоваў у Амане

ГЛЯДЗІЦЕ ТАКСАМА:

ЗША і Іран заявілі пра перамовы аб ядзернай праграме, але разыходзяцца ў тым, ці будуць яны «беспасярэднімі»