Фільм «Лебядзіная песьня Фёдара Озерава» беларускага рэжысэра Юрыя Сямашкі пасьля сусьветнай прэм’еры на Бэрлінскім кінафэстывалі ў лютым трапіў у конкурс Паўднёвакарэйскага кінафэстывалю ў Чанджу, паведамляе Reform.news.
Стужка пра маладога музыку Фёдара была адабраная ў дзясятку фільмаў міжнароднага конкурсу з усяго сьвету.
Поўнамэтражны фільм Юрыя Сямашкі будзе спаборнічаць на фэстывалі зь фільмамі з Аргентыны, Францыі, Індыі, Аўстрыі, ЗША, Японіі.
Паўднёвакарэйскі міжнародны кінафэстываль у Чанджу пройдзе сёлета 26-ы раз з 30 красавіка па 9 траўня. Фэстываль спэцыялізуецца на незалежным і экспэрымэнтальным кіно: сёлета ў аглядзе агулам пакажуць 224 фільмы з 57 краін. Адкрываць падзею будзе сатырычная драма румынскага рэжысэра Раду Жудэ «Кантынэнталь’ 25».
Беларускі поўнамэтражны фільм «Лебядзіная песьня Фёдара Озерава» апавядае гісторыю музыкі, які хоча напісаць новыя песьні і сабраць свой гурт, пакуль людзі навокал рыхтуюцца да Трэцяй усясьветнай вайны. Фёдар выяўляе, што магічны швэдар, які, як хлопец лічыць, дапамагае яму пісаць песьні, зьнік, і таму выпраўляецца на яго пошукі, што прыводзіць да трагічнага здарэньня. У выніку музыка здабывае сваю славу, праўда, у вельмі неканвэнцыйнай публікі.
У карціне здымаліся беларускія акторы і музыкі Вячаслаў Кміт, Віялета Рагачова, Павал Гарадніцкі, Міхал Зуй, Наста Рысік, Аляксей Любчанка. Апэратар стужкі Сяргей Кавалёў.
«Лебядзіная песьня» здымалася ў Варшаве, але дзеяньне карціны адбываецца ў Беларусі, бачныя беларускія грошы, менскі адрас у google-мапах на экране тэлефона, героі размаўляюць па-беларуску і па-расейску. Старт стужцы даў Інкубатар мікрабюджэтнага кіно ініцыятывы Belarusian Filmmakers Network, пачатковы бюджэт склаў 4 тысячы эўра, на этапе постпрадукцыі ён вырас у некалькі разоў, але застаўся мізэрным па мерках эўрапейскай кінаіндустрыі.
14 лютага прэм’ера фільму «Лебядзіная песьня Фёдара Озерава» адбылася на Бэрлінскім міжнародным кінафэстывалі. Стужка атрымала ўзнагароду ад чытачоў бэрлінскай газэты Tagesspiegel.
Падрабязьней аб прэм’еры фільму Свабода расказвала раней.
Форум