36 праваабарончых арганізацый, у тым ліку «Рэпартэры бязь межаў» (RSF) і Амэрыканскі ПЭН-цэнтар, зьвярнуліся ў Кангрэс ЗША з просьбай абараніць журналістаў, жыцьцё і свабода якіх знаходзяцца пад пагрозай пасьля распараджэньня прэзыдэнта Дональда Трампа ад 14 сакавіка. Пра зварот паведамляе сайт «Рэпартэраў бязь межаў».
У сумесным лісьце праваабаронцы заклікалі адміністрацыю ЗША, у прыватнасьці Дзяржаўны дэпартамэнт, выдзеліць неабходныя рэсурсы для падтрымкі замежных журналістаў, якія працуюць у Агенцтве ЗША ў глябальных СМІ (USAGM).
«Гэта абуральна, што гэтыя журналісты, якія рызыкуюць сваім жыцьцём, выкрываючы маштабы рэпрэсій у сваіх краінах, могуць быць цалкам пакінутыя. Кангрэс ЗША павінен узяць на сябе адказнасьць за абарону гэтых журналістаў і ўсіх сродкаў масавай інфармацыі, якія фінансуюцца USAGM, якія фінансуюцца самім Кангрэсам. „Гэтая адказнасць ня толькі маральная — яна вынікае з прыхільнасьці Злучаных Штатаў абароне прынцыпаў дэмакратыі і свабоды прэсы“», — сказаў генэральны дырэктар RSF Тыбо Брэтэн.
11 журналістаў, зьвязаных з USAGM, знаходзяцца ў турмах у розных краінах: пяцёра ў Віетнаме, двое ў Расеі і па адным у Беларусі, Азэрбайджане і М’янме.
Паводле інфармацыі RSF, у сувязі з прыпыненьнем дзейнасьці агенцтва як мінімум 84 журналісты, якія знаходзяцца ў ЗША па працоўных візах, могуць быць дэпартаваныя ў краіны, дзе ім пагражае арышт, перасьлед і турэмнае зьняволеньне. Найбольшай рызыцы падвяргаюцца журналісты зь Беларусі, Камбоджы, Кітаю, Ганконгу, Расеі і Віетнаму.
Прэзыдэнт ЗША Дональд Трамп 15 сакавіка падпісаў распараджэньне аб скарачэньні сямі фэдэральных агенцый, у тым ліку Агенцыі ЗША ў глябальных СМІ (USAGM), якое курыруе Радыё Свабодная Эўропа/Радыё Свабода і іншыя СМІ.
USAGM — незалежная ўрадавая агенцыя ЗША, якая перадае навіны і інфармацыю амаль на 50 мовах прыкладна 361 мільёну чалавек у тыдзень.
Форум