«Рэалізаваная прадукцыя вытворчасьці ААТ „Беларуськалій“, якая знаходзіцца ў 50 чыгуначных вагонах, агульны аб’ём 3524 тоны хлярыду калію. Агульная сума рэалізацыі склала 39,8 млн грыўняў (амаль 962 тысячы даляраў ЗША), уключаючы мытныя сплаты 14,7 млн грыўняў. У рамках аўкцыёну стартавая цана вырасла амаль на 2,5 млн грыўняў», — гаворыцца ў паведамленьні агенцтва.
Грошы, атрыманыя ад рэалізацыі беларускага калію, накіруюць у тым ліку на набыцьцё ваенных аблігацыяў для падтрыманьня Ўзброеных сіл Украіны.
28 сакавіка агенцтва ўжо прадало 50 вагонаў беларускага калію, тады за 3469 тон выручылі 36,7 млн грыўняў (887 тысяч даляраў ЗША), а 3 сакавіка 61 вагон зь беларускімі ўгнаеньнямі прадалі за 45,5 млн грыўняў (амаль 1,1 млн даляраў ЗША).
Раней, 30 студзеня, у Агенцтве вышуку і мэнэджмэнту актываў (АРМА) Украіны паведамілі аб рэалізацыі з аўкцыёну 2357 тон угнаеньняў, вырабленых «Беларуськаліем» і арыштаваных у чэрвені 2022 годзе за падтрымку Беларусьсю расейскага ваеннага ўварваньня. Як адзначаецца ў паведамленьні АРМА, беларускія ўгнаеньні прадалі за 25,321 мільёна грыўняў (прыблізна 603 тысячы даляраў у эквіваленце).
У студзені праз электронны аўкцыён ад продажу арыштаваных беларускіх угнаеньняў атрымалі 112,6 мільёна грыўняў (больш за 2,5 мільёна даляраў у эквіваленце).
У канцы 2024 году ў АРМА паведамілі аб пачатку маштабнага продажу 30 431 тон хлярыду калію, які на момант пачатку расейскага ваеннага ўварваньня, падтрыманага Беларусьсю, знаходзіліся на тэрыторыі Ўкраіны і былі арыштаваныя.
Беларускія ўгнаеньні прадаюцца паводле правілаў так званага гібрыднага галяндзкага аўкцыёну, калі пачатковая цана лотаў зьніжаецца крок за крокам, пакуль адзін з удзельнікаў ня спыніць зьніжэньне. На наступным этапе ўдзельнікі аўкцыёну ў закрытым рэжыме прапануюць сваю цану, якая мусіць быць вышэйшай за зафіксаваную на першым этапе. Лот набывае ўдзельнік, які прапануе найбольшую цану, але той, хто спыніў падзеньне цаны на першым этапе, мае права апошняга ходу і можа перабіць максымальную цану суперніка. Да аўкцыёну можна далучыцца нават ужо пасьля таго, як ён пачаўся.
- Кіраўніцтва Беларусі падтрымала агрэсію Расеі супраць Украіны і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў.
- Украіна закрыла мяжу зь Беларусьсю, спыніла гандаль, арыштавала маёмасьць і прадукцыю беларускіх прадпрыемстваў і пачала ўмацоўваць сваю мяжу на беларускім кірунку, каб зрабіць немагчымым паўторны наступ расейскіх войскаў зь беларускай тэрыторыі.
