Прыярытэтнымі кірункамі Лукашэнка вызначыў «найбольш пэрспэктыўныя і запатрабаваныя для дзяржавы» сфэры дзейнасьці, «якія дазваляюць у сярэднетэрміновай пэрспэктыве забясьпечыць актуальныя вынікі ў навукаёмістых і высокатэхналягічных сэктарах эканомікі, канкурэнтныя перавагі і тэхналягічную бясьпеку краіны».
Гаворка ідзе пра лічбавыя тэхналёгіі і штучны інтэлект; інавацыйныя тэхналёгіі ў прамысловасьці; біялягічныя і мэдыцынскія тэхналёгіі; інавацыйныя тэхналёгіі ў аграпрамысловым комплексе і харчовай прамысловасьці; навуковыя і навукова-тэхнічныя гарантыі бясьпекі чалавека, грамадзтва і дзяржавы.
У адпаведнасьці зь цяперашнімі прыярытэтамі, вызначанымі дакумэнтам, плянуецца сфармаваць і зацьвердзіць дзяржаўныя праграмы навуковых дасьледаваньняў, навукова-тэхнічныя праграмы, а таксама дзяржпраграму інавацыйнага разьвіцьця Беларусі да 2030 году, адзначае «Позірк» з спасылкай на дакумэнт.
«Пры гэтым узмоцнена роля кіраўнікоў дзяржаўных заказчыкаў праграм. На іх ускладзена пэрсанальная адказнасьць за эфэктыўнае выкарыстаньне сродкаў, своечасовае выкананьне заданьняў і дасягненьне заплянаваных вынікаў», — гаворыцца ў паведамленьні.
На цырымоніі ўручэньня дыплёмаў доктара навук і атэстатаў прафэсара 31 студзеня Лукашэнка заявіў, што ў Беларусі ня будзе падтрымкі безвыніковай навуковай дзейнасьці.
3 сьнежня 2024 году на сустрэчы з працоўнай групай па аналізе дзейнасьці Нацыянальнай акадэміі навук (НАН) Беларусі Лукашэнка заявіў, што НАН «ня стала драйвэрам апераджальнага навукова-тэхнічнага разьвіцьця краіны на цяперашнім этапе».
У лютаўскім спавешчаньні, падрыхтаваным групай навукоўцаў, якія вымушана зьехалі зь Беларусі з палітычных прычынаў, гаворыцца, што інстытуцыянальны крызіс, у якім цяпер апынулася Нацыянальная акадэмія навук, «можа быць пераадолены дзякуючы комплекснаму рэфармаваньню, магчымаму толькі ва ўмовах дэмакратызацыі ўсіх сфэраў грамадзкага жыцьця».
Форум