Падаражэюць цыгарэты
У Беларусі з новага месяца падаражэюць тытунёвыя вырабы. У прыватнасьці, цэны на свае цыгарэты павышаюць «ГТФ Нёман», «Табак-Інвест», «Інтэр Табакка» і «Сентоні ПРА».
Некаторыя віды цыгарэт падаражэюць толькі на 5-10 капеек, некаторыя вырастуць на 30 капеек.
Зьмены для кіроўцаў
У Беларусі зацьвердзілі палажэньне аб працоўным часе і часе адпачынку кіроўцаў аўтамабіляў, тралейбусаў і трамваяў. Пастанову прыняло Міністэрства транспарту і камунікацыяў. Зьмены набываюць моц 1 красавіка.
Згодна з пастановай, наймальнікі вызначаюць парадак азнаямленьня кіроўцаў з графікамі работ (зьменнасьці) у рамках заканадаўства аб працы. Таксама вызначана, што ўключаецца ў працоўны час кіроўцы. Каб пазьбегнуць розначытаньня тэрміну «прастоі», апісана, у якім выпадку вызначаецца час прастояў не зь віны кіроўцы падчас працоўнага дня.
Уводзяцца абмежаваньні часу пры кіраваньні аўтамабільным і гарадзкім электрычным транспартам на працягу содняў.
Рост арэнднай велічыні
Ужо з 1 красавіка ў Беларусі павышаюць базавую арэндную велічыню. Адпаведнае рашэньне прыняў урад.
Базавая арэндная велічыня — нарматыў, да якога прывязаны памер арэнднай платы за нерухомасьць у дзяржаўнай уласнасьці і ўласнасьці гаспадарчых таварыстваў.
З 1 красавіка яна складзе 18 рублёў 77 капеек, да гэтага нарматыў быў 17,76 беларускага рубля.
Папярэдні раз паказьнік базавай арэнднай велічыні пераглядалі год таму, 1 красавіка 2024 году. Як растлумачылі ў Дзяржаўным камітэце маёмасьці, павелічэньне нарматыву ў 2025 годзе «дазволіць працягнуць эфэктыўна распараджацца дзяржаўнай маёмасьцю і кампэнсаваць выдаткі арэндадаўцаў на аб’ектах арэнды бяз шкоды ўзроўню спраўнай актыўнасьці».
Базавы тарыф у мабільных апэратараў
Усе мабільныя апэратары Беларусі з 1 красавіка 2025 году ўводзяць так званы базавы тарыф паслуг. Адпаведны ўказ Аляксандар Лукашэнка падпісаў яшчэ летам 2024 году, дата называлася тая ж: першы дзень красавіка.
Усе мабільныя апэратары Беларусі прапануюць базавы сацыяльны тарыф. Па-першае, гэта 200 хвілін званкоў на ўсе сеткі. Па-другое, 50 sms-паведамленьняў, па-трэцяе, 2 ГБ інтэрнэт-трафіку.
Што да цаны базавага сацыяльнага тарыфу, то яна будзе складаць каля 12 беларускіх рублёў.
Зьмена парадку залічэньня ў першую клясу
Міністэрства адукацыі абнавіла правілы залічэньня першаклясьнікаў у школы.
Па-першае, да 1 красавіка мелі быць перагледжаны і абноўлены замацаваныя за канкрэтнай школай або гімназіяй межы раёну. Па-другое, да 10 красавіка 2025 году на сайтах усіх школ зьявяцца зьвесткі аб новых межах мікрараёнаў, аб колькасьці месцаў для першаклясьнікаў, сьпіс неабходных для залічэньня дакумэнтаў. Будзе апублікаваны таксама графік працы прыёмнай камісіі, якая будзе залічваць юных шкаляроў у першыя клясы.
З 12 чэрвеня пачнуць прымаць дакумэнты ад бацькоў дзяцей, якія жывуць у замацаваным за школай мікрараёне. У пэрыяд з 12 чэрвеня па 15 жніўня можна будзе запісацца на прыём да дырэктара, калі дзіця не зарэгістравана ў раёне, але хоча паступіць у школу. Таксама можна будзе напісаць заяву, якую зарэгіструюць у адмысловым журнале.
Залічваць на вольныя месцы, калі такія ў школе застануцца, будуць з 16 па 28 жніўня, у парадку чаргі заяваў, якія паступілі раней.
Вялікія выходныя
Беларусаў у красавіку 2025 чакаюць тры выходныя дні запар: ад нядзелі, 27 красавіка, па аўторак, 29 красавіка, калі праваслаўныя вернікі адзначаюць Радаўніцу.
Пры гэтым панядзелак, 28 красавіка, трэба будзе адпрацаваць загадзя, паводле рашэньня ўраду Беларусі працоўнай будзе субота, 26 красавіка.
Забарона на лоўлю рыбы
Як паведамілі ў Дзяржаўнай інспэкцыі аховы жывёльнага і расьліннага сьвету, у Беларусі ўводзіцца штогадовая нераставая забарона на лоўлю рыбы. Тэрміны забароны залежаць ад рэгіёну, бо ў Гомельскай і Берасьцейскай абласьцях лоўля забароненая ўжо з 20 сакавіка (і па 18 траўня).
З 1 красавіка да 30 траўня нераставая забарона ўводзіцца адразу ў трох вобласьцях Беларусі: Менскай, Магілёўскай і Горадзенскай.
Рыбакі самага паўночнага рэгіёну — Віцебскай вобласьці — мусяць адмовіцца ад лоўлі рыбы з 10 красавіка і па 8 чэрвеня.
Вырасьце дапамога на хаўтуры
З 1 красавіка павялічваецца дапамога на пахаваньне, красавіцкая велічыня — 2428 рублёў 10 капеек.
Згодна зь дзейнымі ў Беларусі правіламі, дапамога залежыць ад памеру сярэдняй заработнай платы ў краіне і роўная яе велічыні за пазамінулы месяц.
У лютым 2025 году сярэдняя заработная плата вырасла на 70 капеек і склала 2428,1 рубля. Такім чынам, у красавіку памер дапамогі на пахаваньне павялічыцца ў параўнаньні з сакавіком на тыя ж 70 капеек.
Форум