Адыход з Суджы паказаны на мапе, якую апублікаваў Генштаб. Раней аб узяцьці Суджы паведаміла Мінабароны РФ.
У зводцы ўкраінскага Генштабу паведамляецца аб 20 баявых сутыкненьнях у Курскай вобласьці за мінулыя суткі. Сьцьвярджаецца, што пад кантролем УСУ застаюцца некалькі населеных пунктаў, якія знаходзяцца на адлегласьці 5-6 км ад дзяржаўнай мяжы.
Пры гэтым украінскае камандаваньне абвяргае паведамленьні аб атачэньні расейскімі войскамі групоўкі УСУ ў Курскай вобласьці. Журналісты-расьсьледнікі, якія вывучаюць канфлікт, таксама гэтага не пацьвярджаюць. Аб атачэньні ўкраінскіх вайскоўцаў заяўляў як прэзыдэнт Расеі Ўладзімір Пуцін, так і прэзыдэнт ЗША Дональд Трамп, які прапанаваў Пуціну гуманна абысьціся з украінскімі жаўнерамі, што патрапілі ў атачэньне.
Прэзыдэнт Украіны Ўладзімір Зяленскі ўчора абвясьціў апэрацыю ў Курскай вобласьці завершанай. Ён заявіў, што дзякуючы гэтай апэрацыі ўдалося адцягнуць частку расейскіх войскаў з Данецкай вобласьці. «Я лічу, што яна [апэрацыя УСУ ў Курскай вобласьці] сваю задачу выканала. Я думаю, што на Пакроўскім напрамку цяпер сытуацыя стабільная, і будзе вельмі няпроста зноў знайсьці магчымасьць акупаваць Пакроўск», — дадаў Зяленскі.
Форум