На будаўніцтва новага Нацыянальнага гістарычнага музэю зь дзяржаўнага бюджэту ўлады выдзелілі 6 млн рублёў, вынікае з дакумэнту, апублікаванага на Нацыянальным прававым інтэрнэт-партале.
Выдзеленыя грошы пойдуць у тым ліку і на фінансаваньне праектна-пошукавых працаў, якія папярэднічалі пачатку ўзьвядзеньня аб'екта, вынікае з дакумэнту.
6 верасьня Лукашэнка расказаў пра новы гістарычны музэй, які мае зьявіцца ў Менску.
«Ніякай палітызацыі. Ніякага „ўра“ ў дачыненьні да там Лукашэнкі, пятровых, сідаравых, якія нібыта вяршылі гісторыю, а народу пры гэтым не відаць. Усё павінна быць абсалютна аб’ектыўна і заслужана», — сказаў Лукашэнка пра будучы музэй.
І загадаў, каб з канцэпцыяй гісторыі ў гэтым музэі «маглі пагадзіцца ня толькі беларусы, але і іншыя народы».
Разам з тым яшчэ ў 2022 годзе Лукашэнка стварыў Раду па гістарычнай палітыцы. Яна стала пастаянна дзейным міжведамасным кансультатыўным і каардынуючым органам «па правядзеньні адзінай дзяржаўнай палітыкі ў сфэры гістарычнай памяці».
Гэтая структура вызначае стратэгіі і задачы гістарычнай палітыкі, распрацоўвае падыходы і меры па яе рэалізацыі, каардынуе дзейнасьць дзяржаўных органаў і іншых арганізацый у сфэры гістарычнай палітыкі, рыхтуе ў рамках кампэтэнцыі праекты нарматыўных прававых актаў і заключэньняў, вывучае маніторынг грамадзкай думкі па сацыяльна-гуманітарных пытаньнях.
Акрамя таго, рада мае права ініцыяваць прысваеньне найменьняў геаграфічным аб’ектам і іх перайменаваньне, увекавечваньне памяці загінулых вайскоўцаў, вядомых асобаў, каардынаваць выдавецкую дзейнасьць, у тым ліку даваць рэкамэндацыі па прадухіленьні і спыненьні парушэньняў у галіне захаваньня гістарычнай памяці.
Форум