Усяго з траўня 2020 году рашэньні аб прызнаньні палітвязьнямі прымаліся ў дачыненьні да ня менш як 3776 чалавек. На волі ў сувязі з адбыцьцём тэрміну, вызваленьнем ад пакараньня або ў сувязі са зьмяненьнем меры стрыманьня ўжо знаходзяцца 2542 чалавекі, зь якіх 541 жанчына.
У лютым падлічана колькасьць асуджаных у студзені, 89 (65 мужчын, 24 жанчыны), адзін чалавек у студзені быў асуджаны ў парадку працэдуры завочнага вядзеньня, зазначаецца ў аглядзе.
У лютым 2025 году «Вясна» зафіксавала мінімум 656 выпадкаў палітычна матываваных рэпрэсій (затрыманьні, ператрусы і інш.), якія вынікаюць з крымінальнага і адміністрацыйнага перасьледу. Адносна ня менш як 352 чалавек вынесены пастановы ў адміністрацыйных справах.
На працягу лютага ў судах разглядаліся крымінальныя справы ў дачыненьні да як мінімум 304 абвінавачаных; вынесена сама меней 352 пастановы ў адміністрацыйных справах. Пры гэтым праваабаронцы адзначаюць, што ўлады «старанна хаваюць колькасныя дадзеныя аб маштабах палітычна матываванага крымінальнага і адміністрацыйнага перасьледу».
Захоўваецца таксама рост колькасьці завочных палітычна матываваных судоў і тэндэнцыя пашырэньня прымяненьня спэцвядзеньня супраць непублічных, немэдыйных людзей.
Па стане на 24 лютага 2025 году як мінімум 41 чалавек асуджаны за ахвяраваньні беларускім добраахвотнікам, якія ваююць ва Ўкраіне супраць расейскіх агрэсараў. За намер ваяваць на баку Ўкраіны асуджана ня менш як 30 чалавек. За перадачу ў СМІ фатаздымкаў і відэазапісаў з расейскай вайсковай тэхнікай асуджана ня менш як 93 чалавекі.
У «Пералік грамадзян Рэспублікі Беларусь, замежных грамадзян або асобаў без грамадзянства, якія маюць дачыненьне да экстрэмісцкай дзейнасьці» за люты ўнесена яшчэ 90 чалавек.
Суды вынесьлі 141 рашэньне аб прызнаньні інфармацыйнай прадукцыі «экстрэмісцкімі матэрыяламі».
Форум