Кансэрватыўная Wall Street Journal піша аб тым, што ў выніку «прадстаўленьня ў Авальным кабінэце» выйграў Пуцін: «Дзіўна назіраць за хаўрусьнікамі Трампа, якія абараняюць гэта фіяска як праяву сілы Амэрыкі. Амэрыканская цікавасьць заключаецца ў задушэньні імпэрскіх задумаў Уладзіміра Пуціна па аднаўленьні страчанай савецкай імпэрыі, вынікам чаго стане кровапраліцьце і ўдар па амэрыканскіх інтарэсах», — заяўляе газэта.
«Дзень амэрыканскай ганьбы», — з такім камэнтаром выступіла лібэральная The New York Times.
«Праблема заключаецца ў тым, што прэзыдэнт Трамп хоча дамагчыся перамір’я паміж Украінай і Расеяй, адчуваючы пры гэтым пачуцьцё раздражненьня ў дачыненьні ўкраінскага кіраўніцтва, якое, як ён лічыць, падтрымлівала яго палітычных апанэнтаў», — гаворыць у інтэрвію Радыё Свабода амэрыканскі публіцыст і знаўца Расеі Дэвід Сатэр.
«У такой сытуацыі рэзкая рэакцыя віцэ-прэзыдэнта Вэнса на цалкам зразумелы адказ Уладзіміра Зяленскага аб поўным правале дыпляматычных спробаў спыніць Пуціна ў мінулым выклікала вельмі эмацыйную рэакцыю Дональда Трампа. Мне здаецца, што ні прэзыдэнт Трамп, ні яго асяродзьдзе не разумеюць, што яны ня могуць быць эфэктыўнымі пасярэднікамі, калі затаілі крыўду на адзін з бакоў канфлікту і хочуць яго пакараць. З гэтым не пагодзяцца ўкраінцы, з гэтым не пагодзяцца нашы хаўрусьнікі, і многія амэрыканцы з гэтым не пагодзяцца.
Сытуацыя трывожная. Прадказаць штосьці немагчыма, бо шмат залежыць ад настрою Трампа. Я спадзяюся на амэрыканскую грамадзкую думку. Калі ў Белым доме стане зразумела, што амэрыканцы на баку Ўкраіны, гэта будзе мець значэньне».
Аднаўленьне дачыненьняў магчымае пасьля невялікай паўзы, лічыць гісторык, супрацоўнік цэнтру Дэвіса пры Гарвардзкім унівэрсытэце Джошуа Рубэнстын:
«Я спадзяюся, што Ўладзімір Зяленскі зможа знайсьці магчымасць аднавіць кантакты з Дональдам Трампам у ціхай абстаноўцы, магчыма, зьвярнуўшыся да пасярэдніцтва дыпляматаў. У гэтым яму могуць дапамагчы эўрапейскія хаўрусьнікі Ўкраіны. Сутнасьць у тым, што мірная дамоўленасьць патрабуецца і Расеі, і Ўкраіне, і Трампу, які рэальна хоча спыніць гэтую вайну і зрабіў на гэта публічную стаўку.
Пытаньне ў тым, на якіх умовах. Можна выказаць здагадку, што сур’ёзная спрэчка Трампа і Зяленскага выклікала задавальненьне ў Маскве. Але я ня думаю, што Дональд Трамп можа цалкам адвярнуцца ад Кіева, бо гэта будзе вельмі дрэнна ўспрынята нашымі эўрапейскімі хаўрусьнікамі. І я ня думаю, што гэта будзе ўспрынята як нешта натуральнае пераважнай большасьцю нашых заканадаўцаў ці большасьцю амэрыканцаў.
Да Пуціна ў большасьці амэрыканцаў вельмі нэгатыўнае стаўленьне. Я падазраю, што гэты выбух абурэньня на вачах усёй краіны учас прыёму прэзыдэнта замежнай дзяржавы наўрад ці паслужыць уздыму рэйтынгаў прэзыдэнта Трампа, за выняткам, мабыць, лягеру яго безумоўных прыхільнікаў».
Палітоляг Эрык Шыраеў прапануе два магчымыя сцэнары далейшага разьвіцьця падзей:
«Першы — угода з Украінай будзе сарваная. Зяленскі падасьць у адстаўку, але вайна працягнецца, бо на несправядлівы мір ня пойдзе ні адзін украінскі лідэр. Пры гэтым прэзыдэнт Трамп будзе абвінавачваць усіх астатніх у няздольнасьці заключыць мір.
Другі сцэнар — угоду адкладуць, Эўропа тэрмінова дасьць істотную дапамогу Ўкраіне. Але да таго, як гэтая дапамога рэальна дойдзе да Кіева, вайна працягнецца. Вашынгтон, магчыма, ня згорне ўсю падтрымку, бо частка дапамогі ўжо замацаваная ў законах, прынятых Кангрэсам. Але ў такім выпадку, легенда аб вялікім майстры пагадненьняў, якую Дональд Трамп так доўга культываваў, будзе зазнаваць ўсё большых суворых праверак. І яму ў нейкі момант спатрэбіцца дзеяньне, каб паказаць, што ён здольны дасягнуць рэальных вынікаў».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум