У рэкамэндацыях Камітэт згадаў адсутнасьць у Беларусі ўсёабдымнага закону аб гендэрнай роўнасьці і антыдыскрымінацыйнага заканадаўства, выказаўся пра сур'ёзныя рэпрэсіі ў дачыненьні да абаронцаў правоў жанчын, палітычных актывістак і журналістак і пра бесчалавечныя ўмовы ўтрыманьня жанчын пад вартай, а таксама заклікаў перагледзець крымінальныя справы і вызваліць усіх жанчын, чыё зьняволеньне становіць пагрозу іх здароўю або жыцьцю, піша «Вясна».
Сярод іншага, Камітэт рэкамэндаваў Беларусі:
- Забясьпечыць поўны пераклад Канвэнцыі аб ліквідацыі ўсіх формаў дыскрымінацыі ў адносінах да жанчын на ўсе нацыянальныя мовы, яе інтэграцыю ў нацыянальнае заканадаўства і актыўны ўжытак у судовай практыцы, зьбіраць і публікаваць зьвесткі пра судовыя рашэньні ў справах, зьвязаных з дыскрымінацыяй жанчын у Беларусі.
- Прыняць усёабдымны закон аб гендэрнай роўнасьці, забясьпечваць сыстэматычны перагляд усіх законапраектаў на прадмет іх уплыву на правы жанчын і гендэрную роўнасьць да іх прыняцьця.
- Прыняць усёабдымнае антыдыскрымінацыйнае заканадаўства, якое спэцыяльна забараняе ўсе формы дыскрымінацыі ў дачыненьні да жанчын і дзяўчат, уключна з прамой і ўскоснай дыскрымінацыяй у дзяржаўных і прыватных сфэрах.
- Перагледзець усе абвінавачваньні супраць жанчын, незаконна затрыманых за ажыцьцяўленьне сваіх свабодаў выказваньня думак, асацыяцыі і сходаў або за выкананьне сваіх законных функцыяў і спыніць усе распачатыя справы.
- Гарантаваць права на справядлівы суд для ўсіх, умацаваць незалежнасьць судовай сыстэмы, спыніць практыку завочных судоў, аднавіць грамадзянства і юрыдычныя дакумэнты ўсім жанчынам, супраць якіх ужывалі палітычна матываваныя абвінавачаньні.
- Спыніць выкарыстаньне законаў аб супрацьдзеяньні экстрэмізму і тэрарызму супраць тых, хто ажыцьцяўляе свае законныя правы, такія як свабода выказваньня думак, асацыяцыі і сходаў, або хто зьвязаны з арганізацыямі грамадзянскай супольнасьці, асабліва тымі, якія выступаюць за гендэрную роўнасьць і правы жанчын.
- Забясьпечыць, каб абаронцы правоў жанчын, палітычныя актывісткі, прадстаўнікі арганізацый грамадзянскай супольнасьці і журналісткі ў Беларусі і «на выгнаньні» маглі свабодна выказваць сваю думку і займацца праваабарончай дзейнасьцю без пагрозаў перасьледу, цэнзуры і г. д.
- Правесьці расьсьледаваньне і прыцягнуць да адказнасьці вінаватых у парушэньні правоў чалавека ў Беларусі, уключна з адвольнымі затрыманьнямі, перасьледам, цэнзурай і гендэрным гвалтам у дачыненьні да абаронцаў правоў жанчын, палітычных актывістак і журналістак; забясьпечыць эфэктыўную абарону і пакрыцьцё шкоды ахвярам.
- Ліквідаваць ўсе неабгрунтаваныя бар’еры і празьмерныя абмежаваньні для працы НДА і арганізацый грамадзянскай супольнасьці, асабліва тых, якія прасоўваюць правы жанчын і гендэрную роўнасьць.
- Адмяніць палажэньні Закону № 337-Z і прэзыдэнцкага ўказу № 37, якія дапускаюць безразборнае ўжываньне сілы супраць жанчын, дзяцей, уключна з жанчынамі і дзяўчаткамі з інваліднасьцю, і забясьпечыць, каб усе захады па падтрыманьні грамадзкай бясьпекі і парадку былі прапарцыйныя і адпавядалі міжнародным стандартам у галіне правоў чалавека.
- Прывесьці ўмовы ўтрыманьня жанчын пад вартай у адпаведнасьць зь міжнароднымі стандартамі.
- Правесьці расьсьледаваньне ўсіх зарэгістраваных выпадкаў сьмерці жанчын, якія ўтрымліваюцца пад вартай, з траўня 2020 году. Перагледзець крымінальныя справы і вызваліць усіх жанчын, чыё зьняволеньне становіць непасрэдную пагрозу іх здароўю або жыцьцю, з гуманітарных меркаваньняў.
- Забясьпечыць затрыманым жанчынам эфэктыўны, даступны і, пры неабходнасьці, бясплатны доступ да юрыдычнай дапамогі. Адмяніць надгляды з распрананьнем, якія праводзяць ахоўнікі супрацьлеглага полу, забараніць усе формы абыходжаньня, якое зьневажае годнасьць.
- Стварыць канфідэнцыйны і эфэктыўны мэханізм для прыёму скаргаў на сэксуальны гвалт.
- Адмяніць прымусовую працу як крымінальнае пакараньне і рэгуляваць добраахвотную працу гарантыямі справядлівага ўзнагароджаньня і захаваньня нормаў годнай працы. Цалкам выканаць рэкамэндацыі наглядных органаў МАП і рэзалюцыю Міжнароднай канфэрэнцыі працы па Беларусі (чэрвень 2023 г.), уключаючы прыём місіі МАП з эфэктыўным доступам да месцаў утрыманьня пад вартай.
Таксама Камітэт выказаўся па шэрагу іншых тэмаў, сярод якіх гендэрныя стэрэатыпы, гвалт у дачыненьні да жанчын і дзяўчатак, гандаль людзьмі і ўцягваньне ў прастытуцыю, удзел жанчын у палітычным і грамадзкім жыцьці, занятасьць жанчын і сэксуальныя дамаганьні на працоўным месцы, жанчыны-ўцякачкі, жанчыны — прадстаўніцы ЛГБТК-супольнасьці і інш.
Рэкамэндацыі Камітэту цалкам можна паглядзець тут.
Форум