У Гомлі выставілі на аўкцыён аўтамабіль украінкі, якую па абмене вызвалілі зь беларускай турмы

Гомельскі філіял дзяржаўнага прадпрыемства «БелЮрЗабесьпячэньне» выставіў на аўкцыён мінівэн Mercedes-Benz Vito з украінскімі нумарамі, які належыць раней асуджанай у Беларусі па абвінавачаньні ў шпіянажы жыхарцы Чарнігава Натальлі Захаранцы, заўважыла выданьне «Флагшток».

Захаранку летась асудзілі ў Беларусі па абвінавачаньні ў шпіянажы на 9 гадоў пазбаўленьня волі з канфіскацыяй аўтамабіля, але пазьней вызвалілі ў складзе групы ўкраінцаў у рамках абмену палоннымі паміж Расеяй і Ўкраінай.

З аўкцыёну спрабавалі прадаць канфіскаваны ў Захаранкі аўтамабіль. За мінівэн 2008 году выпуску дзяржава хацела атрымаць як мінімум 38,2 тысячы рублёў (12 тысяч даляраў) — такая стартавая цана была пададзеная на аўкцыёне.

Таргі праводзілі 25 лютага, але аўкцыён не адбыўся. Прычынай пазначана тое, што толькі «адзіны ўдзельнік даў згоду на пакупку».

• Натальля Захаранка — прадпрымальніца, у 2022–2023 годзе яна практычна штомесяц езьдзіла ў беларускі Мазыр праз Польшчу. Перавозіла людзей, дакумэнты, рэчы. Мяжа Беларусі з Украінай пасьля ўварваньня Расеі закрытая, таму паслугі Натальлі карысталіся попытам. Яна часта вывозіла беларусаў ва Ўкраіну, да сваякоў, а таксама дапамагала ўкраінцам выяжджаць зь Беларусі. Практычна год беларускія ўлады ня мелі да Натальлі прэтэнзій. Але ў ліпені 2023 году яна раптам зьнікла ў Мазыры і знайшлася ў гомельскім СІЗА.
• На пачатку сакавіка 2024 году Анатоль Сотнікаў, прызначаны Лукашэнкам на пасаду судзьдзі ў Гомель, прызнаў Натальлю Захаранку вінаватай у «агентурнай дзейнасьці» і прысудзіў ёй 9 гадоў зьняволеньня з канфіскацыяй аўтамабіля. Суд быў закрыты. Праваабаронцы прызналі Захаранку палітзьняволенай. Яе сяброўку з Мазыра Ларысу Крупу Сотнікаў тады назваў вінаватай у неданясеньні аб злачынстве і загадаў спагнаць зь яе штраф памерам 4 тысячы рублёў.
• У ліпені 2024 году Ўкраіна і Расея чарговы раз абмяняліся ваеннапалоннымі. У рамках гэтага абмену вызвалілі дзесяць украінцаў, пяцёра зь якіх знаходзіліся ў беларускіх турмах. Сярод вызваленых была і жыхарка Чарнігава Натальля Захаранка.

Свабода раней расказвала гісторыю Натальлі Захаранкі:

ГЛЯДЗІЦЕ ТАКСАМА:

Гісторыя кантрабандысткі. Як праз паказаньні ўкраінкі асудзілі беларускіх мытнікаў, а праз сем гадоў яе саму абвінавацілі ў шпіянажы

ГЛЯДЗІЦЕ ТАКСАМА:

«Везьлі зь мяшкамі на галаве, не казалі, куды». Гісторыя ўкраінкі, якую па абмене вызвалілі зь беларускай турмы

ГЛЯДЗІЦЕ ТАКСАМА:

У Гомлі пройдзе суд па справе ўкраінкі, якую па абмене вызвалілі зь беларускай турмы, і яе сяброўкі з Мазыра