Пагадненьне, копію якога атрымала Радыё Свабодная Эўропа/Радыё Свабода, не закранае некаторых ключавых пытаньняў і пакідае большасьць дэталяў на вырашэньне ў будучым дадатковым пагадненьні.
Цяперашняе пагадненьне ня ўтрымлівае канкрэтных гарантый бясьпекі ЗША для Украіны, што зьяўляецца ключавым патрабаваньнем Кіева. У пагадненьні таксама не ўдакладняецца, ці будуць ЗША працягваць пастаўкі вайсковай тэхнікі і боепрыпасаў ва Ўкраіну. Але там гаворыцца, што ЗША «падтрымліваюць намаганьні Ўкраіны атрымаць гарантыі бясьпекі».
У ім таксама гаворыцца, што Вашынгтон «будзе захоўваць доўгатэрміновыя фінансавыя абавязаньні па разьвіцьці стабільнай і эканамічна квітнеючай Украіны».
Тэкст пагадненьня пачынаецца з таго, што Вашынгтон «забясьпечыў значную фінансавую і матэрыяльную падтрымку Ўкраіне пасьля поўнамаштабнага ўварваньня Расеі».
Але ў ім ня згадваецца патрабаваньне Вашынгтона аб праве на 500 мільярдаў долараў патэнцыйнага даходу ад доступу да мінэральных рэсурсаў Украіны, што было заўважана ў папярэднім праекце зьдзелкі.
Гэта быў пункт, які прэзыдэнт Украіны Ўладзімір Зяленскі неаднаразова называў непрымальным.
Акрамя агульных заяваў, асноўная частка пагадненьня тычыцца стварэньня сумеснага інвэстыцыйнага фонду рэканструкцыі. Украіна пагадзілася ўкладваць у фонд 50 працэнтаў будучых даходаў ад прыродных рэсурсаў, якія належаць дзяржаве.
У пагадненьні гаворыцца, што гэта датычыцца карысных выкапняў, нафты і газу, а таксама адпаведных даходаў ад тэрміналаў і партоў звадкаванага прыроднага газу (СПГ).
У пагадненьні таксама адзначаецца, што «такія будучыя крыніцы даходаў не ўключаюць цяперашнія крыніцы даходаў, якія ўжо ўваходзяць у склад агульных даходаў бюджэту Ўкраіны».
Грошы з фонду будуць рэінвэставаць ва Ўкраіну «мінімум штогод».
Пытаньні без адказу
Шмат пытаньняў застаецца без адказу. У цяперашнім пагадненьні гаворыцца, што гэтыя пытаньні будуць разгледжаны ў будучым пагадненьні, перамовы па якім працоўныя групы пачнуць «неадкладна».
Сярод гэтых ключавых момантаў — тое, як будзе разьмяркоўвацца сумесная ўласнасьць фонду. Магчыма, што гэта будзе ня проста 50-50. Падрабязнасьці «кіраваньня і працы» фонду таксама яшчэ не вырашаны.
У зьдзелцы гаворыцца, што ні адзін з бакоў ня можа «прадаваць, перадаваць або іншым чынам распараджацца» любой часткай фонду бяз згоды іншага боку. Іншымі словамі, ні адзін з бакоў ня можа выйсьці зь фонду ў аднабаковым парадку.
У пагадненьні гаворыцца, што яно падлягае зацьвярджэньню парлямэнтам Украіны, Вярхоўнай Радай, але ня згадваецца падпісаньне Кангрэсам ЗША.
Украінскі заканадаўца Багдан Кіцак з кіруючай партыі Зяленскага «Слуга народу» заявіў украінскай службе Радыё Свабода, што ўгода прынесла патэнцыйныя выгады для эканомікі.
«Гэта патрабуе вялікай колькасьці спэцыялістаў, навуковых дасьледаваньняў і зьяўленьня новых тэхналёгій», — сказаў ён, дадаўшы, што амэрыканскія інвэстыцыі могуць стварыць «новую эканоміку».
Былы дарадца Зяленскага па эканамічных пытаньнях Алег Усьценка заявіў Радыё Свабода, што «сымболіка адыгрывае тут большую ролю, чым фінансавыя і эканамічныя пытаньні».
Для прэзыдэнта ЗША Дональда Трампа гэта можа стаць палітычнай перамогай. Ён моцна настойваў на зьдзелцы, і цяпер ён яе атрымаў.
Зяленскага чакае спрэчка наконт дэталяў. На гэты момант пагадненьне магло б зьмякчыць жорсткія публічныя разыходжаньні, у выніку якіх Трамп назваў Зяленскага «дыктатарам».
Форум