На канец 2024 году ў Польшчы афіцыйна працавалі 134 900 грамадзян Беларусі — менавіта столькі беларусаў было ахоплена пэнсійным страхаваньнем, сьведчыць статыстыка Ўпраўленьня сацыяльнага страхаваньня Польшчы.
Гэта на 5500 чалавек больш, чым год таму, вынікае са статыстыкі (129,4 тысячы на канец 2023 году). Беларусы — другая па колькасьці група сярод замежнікаў, якія легальна працуюць у Польшчы пасьля ўкраінцаў (787,5 тысячы на канец 2024 году).
Агулам на ўліку ў органах сацыяльнага страхаваньня ў Польшчы на канец 2024 году стаялі звыш 1 млн 192 тысяч замежнікаў, за год іх колькасьць вырасла на 65,1 тысячы.
Нягледзячы на тое што колькасьць афіцыйных работнікаў зь Беларусі ў Польшчы павялічваецца, згаданы прырост у 2024 годзе — самы нізкі за апошнія 8 гадоў, піша выданьне Most, якое прааналізавала статыстыку за папярэднія гады.
Так, у канцы 2020 году ў Польшчы легальна працавалі 50,6 тысячы грамадзян Беларусі. Праз год, у канцы 2021 году, іх было ўжо 71,2 тысячы. У канцы 2022 году ў сіыстэме сацыяльнага страхаваньня Польшчыбыло зарэгістравана ўжо 108,1 тысячы грамадзян Беларусі, у 2023 годзе — яшчэ на 21,3 тысячы чалавек больш.
Цяперашняе запаволеньне тэмпаў працаўладкаваньня беларусаў у Польшчы тлумачаць і запаволеньнем палітычнай эміграцыі, і ўзмацненьнем строгасьці візавай палітыкі ў Польшчы.
- За 2024 год памежная служба Польшчы выявіла 902 беларусаў, якія нелегальна працавалі ці займаліся гаспадарчай дзейнасьцю ў краіне — на 7% болей, чым у 2023 годзе (864 беларусаў). Часьцей за ўсё на нелегальнай працы ў Польшчы пападаюцца грамадзяне Ўкраіны (летась 4576 выпадкаў), Грузіі (1122) і Калюмбіі (1082).
Форум