Хроніка перасьледу 13 лютага: 72-гадовага палітвязьня Дземідовіча будуць судзіць дзявяты раз

У Лепелі мужчыну асудзілі да 1,5 года «хатняй хіміі» за сарваны дзяржаўны сьцяг

У судзе Лепельскага раёна паводле арт. 370 КК (зьдзек з дзяржаўных сімвалаў) да аднаго года і шасьці месяцаў абмежававаньня волі без накіраваньня ва ўстанову адкрытага тыпу («хатняй хіміі») 41-гадовага Аляксея Маладыка. Прысуд вынес Міхаіл Юрчанка, паведамляе «Вясна».

Агулам у Беларусі паводле артыкула 370 КК (зьдзек з дзяржаўных сімвалаў) асудзілі мінімум 215 чалавек.

ГЛЯДЗІЦЕ ТАКСАМА:

Хроніка перасьледу 5 лютага: падлетка з Ваўкавыску асудзілі за зрэзаны дзяржаўны сьцяг; у Мёрах і Паставах суды за «экстрэмізм»

72-гадовага палітвязьня Дземідовіча будуць судзіць дзявяты раз

Праваабаронцам «Вясны» стала вядома, што ў судзе Смалявіцкага раёна 20 лютага будуць разглядаць ужо дзявятую крымінальную справу супраць пэнсіянэра Вастля Дземідовіча, якому 72 года.

Гэтым разам яго абвінавачваюць паводле арт. 369 КК (абраза прадстаўніка ўлады). Справу будзе весьці судзьдзя Аляксандр Казлоўскі.

Агулам Васіля асудзілі да сямі гадоў пазбаўленьня волі, пры гэтым вынік апошніх трох судоў пакуль невядомы. У зьняволеньні Васіля Дземідовіча ўтрымліваюць амаль тры гады.

Цяпер Дземідовіч адбывае тэрмін у івацэвіцкай калёніі № 22. У сувязі з тым, што палітзьняволенага ўнесьлі ў «сьпіс тэрарыстаў», яму нельга рабіць грашовыя пераводы. За апошнія гады ён перажыў дзясяткі этапаў.

ГЛЯДЗІЦЕ ТАКСАМА:

71-гадовага пэнсіянэра Васіля Дземідовіча судзяць чацьвёрты раз