Большасьць з 100 сэнатараў падтрымалі кандыдатуру Рубіё. Ён стаў першым амэрыканцам лацінаамэрыканскага паходжаньня, які заняў пасаду галоўнага дыплямата краіны, паведамляе Голас Амэрыкі.
53-гадовы сэнатар, які нарадзіўся ў Флорыдзе, у мінулым выступаў за жорсткую замежную палітыку ў дачыненьні да геапалітычных супернікаў ЗША, уключаючы Кітай, Іран і Кубу.
За апошнія некалькі гадоў ён зьмякчыў некаторыя са сваіх пазыцый, каб яны больш цесна адпавядалі поглядам Трамп. Трамп абвінавачваў папярэдніх прэзыдэнтаў у тым, што яны ўцягвалі ЗША ў дарагія і бескарысныя войны, і настойваў на менш інтэрвэнцыянісцкай замежнай палітыцы.
Рубіё папярэдзіў падчас слуханьняў аб яго зацьвярджэньні на пасадзе, што ЗША павінны зьмяніць курс, каб пазьбегнуць большай залежнасьці ад Кітая.
Хто такі Марка Рубіё?
53-гадовы Марка Рубіё, сын кубінскіх імігрантаў, адзін з самых вядомых прыхільнікаў актыўнай замежнай палітыкі Злучаных Штатаў. Ён вядомы рэзкай крытыкай аўтарытарных рэжымаў — кітайскага, іранскага, кубінскага. Падчас першага прэзыдэнцкага тэрміна Дональда Трампа Рубіё быў адным з ініцыятараў законапраекту, які ўскладняе працэдуру адмовы ЗША ад сяброўства ў NATO. Гэта быў адказ на скептычнае стаўленьне прэзыдэнта Трампа да NATO.
Аднак пасьля Рубіё выказваў падобныя з Дональдам Трампам погляды ў міжнародных пытаньнях. У красавіку сёлета ён быў адным з 15 сэнатараў-рэспубліканцаў, якія прагаласавалі супраць выдзяленьня Ўкраіне шматмільярднага пакета дапамогі. У сваіх апошніх інтэрвію ён казаў аб тым, што Ўкраіне неабходна засяродзіцца на дасягненьні дамоўленасьці з Расеяй, калі нават яно не прывядзе да вяртаньня ўсёй акупаванай Расеяй украінскай тэрыторыі. Канфлікт, паводле яго, «неабходна завяршыць».
Кадравыя зьмены ў Дзярждэпартамэнце
Як паведамляе агенцтва Reuters, у панядзелак больш за дзесяць высокапастаўленых кар’ерных дыпляматаў павінны будуць пакінуць свае пасады. Агенцтву пра гэта паведамілі дзьве знаёмыя з сытуацыяй крыніцы ў адміністрацыі, паколькі прэзыдэнт, які зноў заступіў на пасаду, імкліва фармуе сваю замежную палітыку і дыпляматычны корпус.
Сярод тых, хто павінен быў пакінуць свае пасады пасьля інаўгурацыі Трампа ў панядзелак — трэці па значнасьці кіраўнік Дзярждэпартамэнту Джон Бас, які выконваў абавязкі намесьніка дзяржсакратара ў палітычных пытаньнях і быў куратарам палітыкі ад Азіі да Эўропы і Блізкага Ўсходу, паведамілі крыніцы. Пра тое, што плянуецца яго адстаўка, упершыню паведаміла газэта Washington Post.
Адна з крыніц паведаміла, што ўсе супрацоўнікі Дзярждэпартамэнту на ўзроўні намесьнікаў і памочнікаў дзяржсакратара (фактычна ўсе два ўзроўні кіраўнікоў, якія знаходзяцца ніжэй за дзяржсакратара) атрымалі ад прэзыдэнта прапанову падаць у адстаўку.
Агенцтва Reuters на мінулым тыдні паведаміла, што каманда, якая займаецца пераходам Дзярждэпартамэнту да новай адміністрацыі, папрасіла трох іншых высокапастаўленых карʼерных дыпляматаў, якія адказваюць за кіраваньне пэрсаналам і ўнутраную каардынацыю, пакінуць іхныя пасады.
Трамп паабяцаў «ачысьціць глыбінную дзяржаву (deep state)», звольніўшы бюракратаў, якіх ён лічыць неляяльнымі. Зьмены ў кадравым складзе, падобна, адпавядаюць шырэйшай стратэгіі, накіраванай на ўсталяваньне большага кантролю над фэдэральным урадам, чым у любога іншага сучаснага прэзыдэнта.
Ні Дзярждэпартамэнт, ні пераходная каманда Трампа не адказалі на просьбу агенцтва Reuters аб камэнтары.
Белы дом апублікаваў заяву неўзабаве пасьля інаўгурацыі Трампа ў панядзелак, пералічыўшы асноўныя прыярытэты новага прэзыдэнта.
«Па ўказаньні прэзыдэнта Дзярждэпартамэнт будзе праводзіць замежную палітыку, арыентаваную на Амэрыку ў першую чаргу», — гаворыцца ў заяве Белага дома.
Чаканьні ад новага кіраўніцтва Дзярждэпартамэнту
Чакаецца, што Дональд Трамп прыме больш жорсткі курс у замежнай палітыцы і будзе дабівацца ўсталяваньня міру паміж Украінай і Расеяй, а таксама павелічэньня падтрымкі Ізраілю.
Ён таксама выступае за нестандартныя ініцыятывы, такія як спроба ўключыць Грэнляндыю ў склад ЗША і патрабаваньне да саюзьнікаў па NATO павялічыць выдаткі на абарону.
Экспэрты адзначаюць, што ключавую ролю ў дасягненьні ягоных мэтаў будзе адыгрываць дыпляматычны корпус, які будзе добрасумленна выконваць указаньні, а не супраціўляцца ім.
Марка Рубіё, толькі што зацьверджаны Сэнатам на пасаду дзяржсакратара, заявіў, што Дзярждэпартамэнт быў «маргіналізаваны» і што супрацоўнікі ведамства павінны адыгрываць больш значную ролю ў фармаваньні і рэалізацыі замежнай палітыкі.
Форум