Прэзыдэнт Польшчы Анджэй Дуда зьвярнуўся да ўраду краіны з просьбай забясьпечыць бесьперашкоднае знаходжаньне прэм’ер-міністра Ізраілю Біньяміна Нэтаньягу на польскай тэрыторыі, паведамляе Bloomberg са спасылкай на ліст Дуды прэм’ер-міністру Польшчы Дональду Туску.
У канцылярыі прэзыдэнта Польшчы пацьвердзілі, што прэзыдэнт Анджэй Дуда накіраваў ліст прэм'ер-міністру Дональду Туску з просьбай гарантаваць бясьпеку для прэм'ер-міністра Ізраілю Біньяміна Нэтаньягу, калі той вырашыць узяць удзел у мерапрыемствах 27 студзеня з нагоды 80-й гадавіны вызваленьня вязьняў нацысцкага канцлягера Аўшвіц.
«На думку прэзыдэнта, кожны чалавек з Ізраілю, кожны прадстаўнік улады гэтай краіны павінен мець магчымасьць узяць удзел у гэтым унікальным мерапрыемстве, якое адбудзецца ў Асьвенціме праз два тыдні», — гаворыцца ў паведамленьні канцылярыі прэзыдэнта Польшчы.
У дачыненьні да Нэтаньягу дзейнічае ордэр на арышт, выдадзены Міжнародным крымінальным судом (МКС).
Bloomberg падкрэсьлівае, што зварот Дуды можа паставіць польскі ўрад у складанае становішча, бо Варшава ратыфікавала Рымскі статут і абавязаная выконваць рашэньні МКС. У лісьце прэзыдэнт Польшчы заклікаў распрацаваць адэкватную формулу, якая дазволіла б пазьбегнуць арышту Нэтаньягу і адначасова захаваць павагу да міжнароднага права.
Прадстаўніца ізраільскага прэм’ера адказала, што запрашэньне на мерапрыемствы ў Польшчы для Нэтаньягу пакуль не паступала.
МКС выдаў ордэры на арышт ізраільскага прэм'ера і былога міністра абароны Ізраілю Ёава Галанта ў лістападзе 2024 году. Суд абвінавачвае Нэтаньягу і Галанта ў ваенных злачынствах і злачынствах супраць чалавечнасьці ў сэктары Газа ў пэрыяд з 8 кастрычніка 2023 па 20 траўня 2024 году.
Форум