7 сьнежня на волю выйшла былая дырэктарка і галоўная рэдактарка інфармацыйнага агенцтва БелаПАН палітзьняволеная Ірына Леўшына, вынікае з інфармацыі на прысьвечанай ёй старонцы сайта праваабарончага цэнтру «Вясна», заўважыла выданьне «Позірк». Леўшына цалкам адбыла тэрмін зьняволеньня.
«Прывітаньне ўсім сябрам! 7 сьнежня я шчасна пакінула ПК-4, адбыўшы за кратамі 3 гады 3 месяцы і 3 тыдні. Паколькі я маю намер заставацца ў Беларусі, усялякія камэнтары з майго боку, як вы разумееце, немагчымыя.
Скажу толькі, што са здароўем усё ў парадку, з настроем — таксама. Абвыкаю да волі, да шчасьця быць побач з роднымі, да звычайнага жыцьця. Дзякуй усім, хто хваляваўся за мяне ўвесь гэты час, я адчувала вашу падтрымку на адлегласьці:)», — пазьней напісала Ірына Леўшына ў сваім Фэйсбуку.
Беларуская асацыяцыя журналістаў выключыла Леўшыну са сьпісу калегаў-палітвязьняў.
Кіраўніцу БелаПАН Ірыну Леўшыну і яе папярэдніка на пасадзе дырэктара Дзьмітрыя Наважылава затрымалі 18 жніўня 2021 году.
6 кастрычніка 2022 году Леўшына, Наважылаў, а таксама былы намесьнік дырэктара БелаПАН Андрэй Аляксандраў і ягоная жонка Ірына Злобіна, якія ўтрымліваліся ў няволі з 12 студзеня 2021 году, рашэньнем Менскага абласнога суду былі асуджаныя на розныя тэрміны турэмнага зьняволеньня.
Ірына Леўшына атрымала 4 гады пазбаўленьня волі па абвінавачаньні ў стварэньні «экстрэмісцкага фармаваньня», якім улады палічылі частку супрацоўнікаў інфармацыйнай кампаніі БелаПАН, створанай у лістападзе 1991 году (ч. 1 арт. 361-1 Крымінальнага кодэксу).
У апошнім слове перад вынясеньнем прысуду Леўшына заявіла:
«Рэдакцыю, у якой я прапрацавала амаль 30 гадоў, спрабуюць выставіць экстрэмісцкім фармаваньнем, а мяне — яго стваральнікам і кіраўніком. Гэта поўнае трызьненьне, але гэта ня дзіўна. За апошнія паўтара года ў Беларусі зьнішчаныя дзясяткі сродкаў масавай інфармацыі, сотні журналістаў пазбавіліся працы або вымушаныя былі зьехаць з краіны, баючыся крымінальнага перасьледу.
Зачысткі на інфармацыйным полі беспрэцэдэнтныя і неймаверныя для цывілізаванай дзяржавы ў XXI стагодзьдзі. Нехта відавочна пераблытаў прычынна-выніковыя сувязі, вырашыўшы зрабіць журналістаў адказнымі за падзеі, якія адбыліся ў нашай краіне ў 20-м годзе. Вось толькі мы ні да чога не заклікалі, мы нічога не скажалі і не выдумлялі — рэальнасьць была круцейшая за любую выдумку».
6 студзеня 2023 году Вярхоўны суд, які разглядаў апэляцыю Леўшынай, пакінуў прысуд у сіле.
Галоўная рэдактарка БелаПАН адбывала тэрмін у гомельскай жаночай калёніі, працавала ў швейным цэху.
Форум