«Калі хтосьці паквапіцца на сувэрэнітэт і тэрытарыяльную цэласнасьць Беларусі», то па камандзе Аляксандра Лукашэнкі спэцпадразьдзелы будуць неадкладна ўзмоцненыя людзьмі, якія «маюць досьвед і выдатна валодаюць спосабамі вядзеньня баявых дзеяньняў», заявіў 8 кастрычніка дзяржаўны сакратар Савету бясьпекі Беларусі Аляксандар Вальфовіч, якога цытуе «Позірк».
Прэс-служба Міністэрства ўнутраных справаў апублікавала відэафрагмэнт камэнтара Вальфовіча аб праведзеных 8 кастрычніка комплексных заняткаў з вайсковаабавязанымі, якія раней служылі ў АМАП, спэцыяльным падразьдзеле барацьбы з тэрарызмам «Алмаз», спэцпадразьдзелах унутраных войскаў.
За кошт прыцягненьня гэтых сіл, паводле чыноўніка, «баявы патэнцыял дзейных спэцпадразьдзелаў можа быць узмоцнены ў два-тры разы».
Дзяржаўны сакратар Савету бясьпекі заявіў аб «выдатнай падрыхтоўцы» ўдзельнікаў заняткаў, якія ён назваў новай формай «прызыву вайсковаабавязных: на дзень, на два, у выходны дзень, без выкарыстаньня сыстэмы мабілізацыі, адпрацаванай у Беларусі».
Дзяржаўныя СМІ паведамляюць, што для гэтага кантынгенту сілавікоў падрыхтаваныя форма і камплекты ўзбраеньня.
Міністар унутраных справаў Іван Кубракоў заявіў, што ў МУС на сёньня створаныя 22 атрады «добраахвотнікаў», колькасьць якіх «пастаянна расьце». У іх склад, сказаў ён, уключаныя былыя вайскоўцы ўнутраных войскаў і міліцэйскіх спэцпадразьдзелаў. Вучэньні былых спэцназаўцаў будуць праходзіць па ўсёй краіне, дадаў кіраўнік ведамства.
Комплексныя заняткі з вайсковаабавязанымі, якія раней служылі ў згаданых структурах МУС, прайшлі на палігоне вучэбнага цэнтру спэцыяльнага прызначэньня ўнутраных войскаў.
Гэта праводзілася «ў рамках рэалізацыі даручэньня» Лукашэнкі «прывесьці ў ідэальны стан войска і сілавы блёк у цэлым», адзначыла ведамства.
На першым этапе заняткаў узровень падрыхтоўкі сілавікоў ацэньвалі Вальфовіч, Кубракоў і намесьнік кіраўніка адміністрацыі Лукашэнкі Ўладзімер Пярцоў.
У 2025 годзе ў Беларусі маюць прайсьці прэзыдэнцкія выбары. Апошняя кампанія ў 2020 годзе суправаджалася рэкорднымі для Беларусі сваёй масавасьцю акцыямі пратэстаў, на здушэньне якіх былі кінутыя ўсе сілавыя ведамствы.
Форум