Аб’ём перавозак кантэйнэраў у складзе паскораных кантэйнэрных цягнікоў АТ «ОТЛК ЕРА» на напрамку Кітай — Эўропа — Кітай, якія ідуць транзытам праз Казахстан, Расею і Беларусь, за першае паўгодзьдзе 2024 году склаў 189,1 тысячы ДФЭ («дваццаціфутавых эквівалентаў», адзін ДФЭ прыблізна адпавядае аб'ёму стандартнага кантэйнэра 20x8 футаў). Гэта на 65,8% больш, чым за той жа пэрыяд летась. У чэрвені аб'ём перавозак дасягнуў 36,95 тысячы ДФЭ, што на 111% больш у параўнаньні зь мінулым годам, паведаміла прэс-служба кампаніі АТ «ОТЛК ЕРА».
Галоўныя перавагі гэтага маршруту — хуткасьць і бясьпека дастаўкі, адзначае выданьне 1520International.
Прычыны росту
У красавіку начальнік Цэнтру фірмовага транспартнага абслугоўваньня Аляксей Шыла, які на той момант быў намесьнікам генэральнага дырэктара ААТ «РЖД», паведаміў, што за першы квартал 2024 году перавозкі на гэтым маршруце павялічыліся на 44%. Гэта сьведчыць пра значнае паскарэньне тэмпаў росту ў другім квартале.
Попыт на перавозкі паміж Кітаем і Эўропай узрос у сувязі з крызісам суднаходзтва ў Чырвоным моры. Пасьля таго як емэнскія хусіты пачалі атакаваць гандлёвыя судны ў гэтым рэгіёне, трафік праз Суэцкі канал скараціўся ўдвая. У сьнежні 2023 году праз канал праходзіла 70 суднаў у суткі, а да сакавіка 2024 году гэтая колькасьць зьнізілася да 35 і цяпер застаецца на такім узроўні.
Хуткасьць дастаўкі грузаў ад межаў Кітаю да межаў ЭЗ па-ранейшаму складае 5–7 дзён, што ў сярэднім у 3–5 разоў хутчэй, чым марскім шляхам, адзначаюць экспэрты.
Пасьля таго як многія перавозчыкі адмовіліся ад выкарыстаньня Суэцкага канала і пачалі плыць вакол Афрыкі, розьніца ў тэрмінах дастаўкі яшчэ больш павялічылася. Шлях кантэйнэравоза з Кітаю ў Эўропу праз абходны маршрут займае каля 60 дзён, адзначыў генэральны дырэктар дасьледчага агенцтва InfraNews Аляксей Безбародаў.
Акрамя таго, дастаўка па сушы каштуе амаль удвая таньней, чым па моры. Але галоўныя прычыны, чаму грузаадпраўнікі выбіраюць сухапутны маршрут, — гэта хуткасьць і бясьпека, адзначае аналітык.
Зьніжэньне зваротнага патоку
У АТ «ОТЛК ЕРА» таксама адзначылі зьніжэньне патоку грузаў з Эўропы ў Кітай. Гэтае падзеньне назіраецца ня толькі ў параўнаньні зь мінулым годам, але і з папярэднім кварталам. У другім квартале 2024 году зьніжэньне склала 9% у параўнаньні зь першымі трыма месяцамі году, паведамілі ў кампаніі.
Форум