Да гэтага часу Злучаныя Штаты, як вынікае з дакумэнту, апублікаванага на сайце міністэрства энэргетыкі, валодалі 3748 ядзернымі боегалоўкамі. Гэта на 35 боегаловак больш, чым у 2021 годзе, калі на ўзбраеньні ЗША была рэкордна нізкая колькасьць боегаловак за ўвесь час, пачынаючы з 1962 году, калі гэтыя дадзеныя пачалі публікавацца.
Як адзначаецца ў паведамленьні, цяпер у ЗША на 88% ядзерных боегаловак менш, чым у 1967 годзе, калі іх было найбольш у гісторыі — звыш 31 тысячу. Да 1989 году ў ЗША было крыху больш за 22 тысячы боегаловак.
Адзначаецца, што каля 2 тысяч боегаловак (яны не ўваходзяць у згаданыя вышэй лічбы) цяпер чакаюць дэмантажу. Зь верасьня 2020 году Злучаныя Штаты дэмантавалі 405 ядзерных боегаловак.
У лік 3748 боезарадаў, якімі валодае Пэнтагон, уваходзяць як зарады, якія знаходзяцца на баявым дзяжурстве, так і тыя, што знаходзяцца ў рэзэрве. Гаворка ідзе пра стратэгічныя і нестратэгічныя ядзерныя зарады, пры гэтым у паведамленьні адзначаецца, што колькасьць нестратэгічных (тактычных) ядзерных боегаловак з 1991 году скарацілася больш чым на 90%.
У апублікаваных матэрыялах няма зьвестак аб магутнасьці боегаловак, якія знаходзяцца на ўзбраеньні.
Згодна з дамовай СНУ-3 (аб абмежаваньні стратэгічных наступальных узбраеньняў паміж ЗША і Расеяй), колькасьць разгорнутых стратэгічных ядзерных боегаловак у кожнага з бакоў ня можа перавышаць 1550.
Расея афіцыйна прыпыніла свой удзел у гэтай дмове ў 2023 годзе, заявіўшы пры гэтым, што будзе выконваць тую яго частку, якая тычыцца абмежаваньняў па колькасьці разгорнутых боегаловак.
Пры гэтым расейскія ўлады адмовіліся публікаваць дадзеныя аб памерах ядзернага арсэналу і колькасьці разгорнутых боегаловак. Вядома, што аб’ёмы наяўнай на ўзбраеньні Расеі тактычнай ядзернай зброі, якая ў любым выпадку не падпадае пад абмежаваньні СНУ-3, істотна вышэй, чым у ЗША.
Форум