Сёлета кляшчоў у Беларусі паболела ў паўтара зь лішкам раза

Як гаворыцца ў паведамленьні міністэрства, гэтаму спрыяла раньняя вясна і высокія тэмпэратуры. Праз гэта ў паўднёвых раёнах Беларусі першыя кляшчы зьявіліся ўжо ў лютым.

«Пры лябараторным дасьледаваньні іх інфікаванасьць барэліямі складала каля 25%, а вірусам клешчавага энцэфаліту заставалася нізкай — каля 0,7% проб ад агульнай колькасьці лябараторна дасьледаваных», — адзначана ў паведамленьні.

Міністэрства аховы здароўя рэкамэндуе, сярод іншага, наступныя крокі, каб абараніцца ад кляшчоў:

• пры працяглым знаходжаньні ў лесе насіць вопратку, якая максымальна закрывае цела;
• выкарыстоўваць рэпэленты, якія наносяцца на вопратку або скуру (паводле інструкцыі);
• праводзіць самаагляд і ўзаемныя агляды адзеньня і цела праз кожную гадзіну і па выхадзе зь лесу, каб знаходзіць і здымаць кляшчоў;
• калі вы знайшлі кляшча, які ўжо прысмактаўся, раяць зьвярнуцца ў найбліжэйшую арганізацыю аховы здароўя, дзе акажуць мэдычную дапамогу.

ГЛЯДЗІЦЕ ТАКСАМА:

Мінздароўя прызнала перабоі з пастаўкамі некаторых лекаў у Беларусь і расказала, калі яны зьявяцца