Уратаваныя птушкі
Тыдзень пачаўся з таго, што каля дзіцячага садку ў Берасьці знайшлі савяня. Малое ляжала на зямлі. На месца прыехалі ратавальнікі. Паінфармавалі таксама інспэкцыю прыродных рэсурсаў, паведамляе Берасьцейскі гарвыканкам, які вядзе тэлеграм-канал «Любимый Брест».
Птушаня спрабавалі пасадзіць на дрэва. Але яно валілася з галінкі ўніз. Тады савяня перадалі гадавацца грамадзкаму эколягу ў аграгарадок Чарнаўчыцы. Вэтэрынарная дапамога малому не патрэбная. Прыкладна праз тыдзень птушаня пераедзе ў Менск у Цэнтар дапамогі птушкам і жывёлам «Пустальга».
У сераду, 5 чэрвеня, дапамога спатрэбілася лебедзю ў Горадні. Ён ляцеў над мастом на вуліцы Паповіча, сутыкнуўся з тралейбуснымі правадамі і ўпаў на зямлю. Выклікалі ратавальнікаў. Тыя завезьлі птушку ў заапарк.
Вэтэрынары заапарку высьветлілі, што ў лебедзя невялікія траўмы крылаў і левага вока. Ці ўдарыла птушку токам, няясна. Цяпер ёй праводзяць супрацьзапаленчую і супрацьшокавую тэрапію. Прапісалі ўзмоцненае харчаваньне. На думку вэтэрынараў, праз 2-3 тыдні лебедзь зможа вярнуцца ў прыроду.
Спынілі рух дзеля качынай сям’і
Ізноў птушкі. На мінулым тыдні ў пятніцу, 31 траўня, у Менску кіроўцы спынілі рух на вуліцы Арлоўскай, паведамляў «Онлайнер». Праз дарогу ішла качыная сям’я. Качаняты прайшлі пад агароджай, а качка не магла пералезьці цераз плот. Тады кіроўцы перанесьлі яе на руках. На час пераправы рух на праезнай частцы спынілі, каб не падушыць птушак. Урэшце сям’я качак пайшла ў парк.
У лясах пачаліся грыбы і ягады
У пачатку чэрвеня грыбнікі пачалі зьбіраць лісіцы, баравікі, масьлякі, чырвонагаловікі, паведамлялі ўдзельнікі грыбных супольнасьцяў у інтэрнэце, пісала выданьне «Точка».
Першыя грыбы знайшлі ў лясах Лоеўскага і Жлобінскага раёнаў (Гомельская вобласьць), Чавускага, Бабруйскага, Магілёўскага раёнаў (Магілёўская вобласьць), Стаўпецкага раёну (Менская вобласьць).
«Ды ўсё нармальна, вядро баравікоў, два падасінавікі, лісічкі тры. Усё клас», — напісаў адзін з удзельнікаў грыбной супольнасьці.
У Белавескай пушчы ўжо зьбіраюць чарніцы. Карыстальнік TikTok апублікаваў відэа зь Белавескай пушчы, у якім паказаў сьпелыя ягады, заўважыла выданьне telegraf.news.
«Зялёных яшчэ шмат, вядома, але памаленьку на варэнічкі можна назьбіраць. Так што, калі хто любіць чарніцы, можна ў лес», — расказаў ён.
Удзельнікі грыбных супольнасьцяў паведамлялі, што ў лясах таксама ўжо сасьпелі суніцы. Крыніцы Свабоды з розных мясьцін Беларусі інфармацыю пра грыбы і ягады ў лясах пацьвярджаюць.
Сьвятлана Бень і Сяргей Навіцкі выпусьцілі першы сынгл у праекце WTBSK
Ён называецца «Tut nikomu nie mesca». Трэк пачалі запісваць у польскім Шчэціне, у дамку трунара (майстра ў вырабе трунаў. — РС). Ён застаўся ў парку на месцы старадаўніх францускіх могілак.
«Я перабірала тэксты, напісаныя за апошнія пару гадоў. Вясёлага ў іх было мала. Як і ва ўсім навокал. Альбом атрымліваўся гэткі ж, як домік — каменны, касьцяны, грукатлівы, маласуцяшальны. Суцяшалі толькі старыя дрэвы ў парку, але мы ўвесь час штосьці запісвалі ці гралі і да шпацыру справа так і не дайшла. Потым мы зьехалі ў Бэрлін і вось зараз пачалі патроху выпускаць гэтыя песьні ў сьвет», — напісала Сьвета Бень.
У Белавескай пушчы знайшлі новае месца, дзе расьце рэдкая архідэя
Пальчатакарэньнік травеньскі (Dactylorhiza majalis) — гэта рэдкая архідэя з Чырвонай кнігі. Падчас дасьледаваньняў знайшлі новыя месцы, дзе яна расьце, — у пойме ракі Белая каля вёскі Белая на Магілёўшчыне і ракі Правая Лясная каля вёскі Чарнакі на Берасьцейшчыне.
Папуляцыі невялікія, налічваюць па 25-30 квітнеючых расьлінаў, паведамілі ў Нацыянальным парку «Белавеская пушча».
Форум