Ідэя стварэньня школы ўзьнікла ў экс-акторкі Рускага тэатру, сьпявачкі Анастасіі Шпакоўскай, якая ў канцы жніўня 2020 году вымушаная была зь дзецьмі пакінуць Беларусь. Яна вывучала, куды ўладкаваць вучыцца сваіх дзетак.
У Першай беларускай онлайн-школе ва Ўкраіне ўсе асноўныя прадметы выкладаюць настаўнікі прэстыжнай кіеўскай школы «Мідгард». Там абавязкова вывучаюцца беларускія мова, літаратура, гісторыя, паглыблена — ангельская мова і асновы ІТ.
З нагоды пачатку новага набору заснавальніца школы Анастасія Шпакоўская напісала ў сваім фэйсбуку:
«Шмат чаго адбылося за гады існаваньня школы, але вось у лічбах атрымалася так. Агулам за 4 гады працы нашая школа дапамагла 217 дзецям зь Беларусі ў часовай ці пастаяннай магчымасьці атрымліваць адукацыю. За час навучаньня мы зрабілі тры выпускі навучэнцаў, агулам выдаўшы 42 атэстаты аб базавай адукацыі і 12 аб сярэдняй дзяржаўнага ўзору Ўкраіны.
У нас навучаюцца беларускія дзеці з 12 краін: Беларусі, Расеі, Польшчы, Літвы, Паўночнай Македоніі, Грузіі, Нямеччыны, Кіпру, Турэччыны, Партугаліі, ААЭ і Чарнагорыі.
Таксама мы робім курсы для беларусаў па суботах онлайн, дзе можна далучыцца да беларускай мовы і літаратуры, гісторыі Беларусі і казачных урокаў з Маляванычам».
Анастасія Шпакоўская запрашае ўсіх ахвотных у Першую беларускую онлайн-школу ва Ўкраіне.
Форум