У Берасьці грамадзяніну Ўкраіны прысудзілі 6 гадоў калёніі
Паводле зьвестак @viasna_brest, на мінулым тыдні Берасьцейскі абласны суд вынес вырак Арцёму Макавею, 1999 году нараджэньня. Малады чалавек, які з 2009 году жыве ў Беларусі, атрымаў 6 год пазбаўленьня волі.
У чым менавіта яго абвінавачвалі — невядома, бо суд праходзіў у закрытым рэжыме. Вядомы толькі артыкул, па якім судзілі Макавея: арт.358-1 КК РБ «Агентурная дзейнасьць». Справу разглядаў судзьдзя Мікалай Сянько.
Макавея затрымалі ў студзені 2023 году ў яго дома ў Кобрыні. Затрымлівалі супрацоўнікі КДБ. Спачатку Макавей сядзеў 2 месяцы ў ІЧУ Берасьця, але ніякіх допытаў не праходзіла, і хлопец не разумеў, за што ўвогуле затрыманы. Праз 1 год і 3 месяцы пасьля затрыманьня справа дайшла да суду. Увесь гэты час ён заставаўся пад вартай. Да затрыманьня Макавей працаваў дыджэем у Берасьці, Кобрыні, Менску.
Затрымалі сястру палітвязьня Вінярскага
У Менску затрымалі Алёну Церашкову — яна сківіцава-тваравы хірург, беларуская пісьменьніца, перакладчыца, двухразовая чэмпіёнка Беларусі па тэквандо, піша @dissidentBY.
Алёна — сястра актывіста і палітвязьня Максіма Вінярскага, асуджанага на 5 гадоў пазбаўленьня волі. Папярэдне вядома, што Алёну вінавацяць па арт. 342 ч.1. У яе сямʼі дома чацьвёра дзяцей.
Сілавікі затрымалі 3D-візуалізатара
Сьцьвярджаецца, што ён нібыта ўдзельнічаў у акцыях пратэсту, абражаў у камэнтарах прапагандыста Азаронка, дасылаў інфармацыю ў «Чорную кнігу Беларусі» і прайшоў рэгістрацыю ў чат-боце пляну «Перамога», піша «Вясна».
У якасьці доказаў «пратэставай дзейнасьці» затрыманага сілавікі паказалі кадры з кнігай «Рэвалюцыя» Віктара Марціновіча, якую знайшлі ў беларуса.
Затрыманьне ў Магілёве
Паводле агенцтва «Позірк», жыхара Магілёва затрымалі за напісаньне нібыта 7 тысяч пратэставых камэнтароў. Паведамляецца пра магчымае завядзеньне справы паводле арт. 368 («Абраза прэзыдэнта»).
Перакладчыцы Вользе Калацкай далі штраф памерам 800 рублёў
17 траўня адбыўся адміністрацыйны суд над перакладчыцай Вольгай Калацкай. Афіцыйна — за тое, што «махала рукамі ў РУУС». Суд прызначыў Вользе штраф памерам 20 базавых велічыняў (800 рублёў).
Раней Вольга Калацкая ўжо была асуджаная і цалкам адбыла пакараньне. 24 красавіка 2021 году ў судзе Фрунзэнскага раёну Менску Вольгу Калацкую прызналі вінаватай у тым, што яна пабіла супрацоўніка тэлеканалу СТБ Рыгора Азаронка (дала поўху). Нягледзячы на тое, што фігурантка справы прынесла прабачэньні пабітаму аўтару СТВ і той ня меў да яе матэрыяльных ці маральных прэтэнзій, судзьдзя Ала Скуратовіч пакарала перакладчыцу 2 гадамі абмежаваньня волі без накіраваньня ў папраўчую ўстанову адкрытага тыпу.
У Паставах аштрафавалі ахоўніка крамы
Суд Пастаўскага раёну Віцебскай вобласьці аштрафаваў на 5 базавых велічынь (200 рублёў) ахоўніка крамы Юрыя Катовіча. Прычынай перасьледу стала публікацыя ім у сацыяльнай сетцы «ЎКантакце» асабістых зьвестак Дзьмітрыя Іваненкава, былога прэсавага аташэ футбольнага і хакейнага клюбаў «Віцебск». Юры Катовіч прызнаны вінаватым паводле ч. 3 арт. 23.7 КаАП («Наўмыснае незаконнае распаўсюджваньне пэрсанальных зьвестак фізычных асоб»).
Форум