Лінкі ўнівэрсальнага доступу

Нямецкага дэпутата, які ў Менску сустракаўся з Макеем, падазраюць у хабарніцтве і адмываньні грошай


Пэтр Быстран жорстка крытыкаваў улады Нямеччыны за вайсковую дапамогу Ўкраіне. Архіўнае фота
Пэтр Быстран жорстка крытыкаваў улады Нямеччыны за вайсковую дапамогу Ўкраіне. Архіўнае фота

Расьсьледаваньне справы супраць Пэтра Быстрана зьвязанае з справай вакол прарасейскай прапагандысцкай плятформы Voice of Europe.

Пракуратура Мюнхэна пачала расьсьледаваньне справы супраць дэпутата Бундэстагу ад правапапулісцкай партыі «Альтэрнатыва для Нямеччыны» Пэтра Быстрана паводле падазрэньня ў хабарніцтве і адмываньні грошай.

Як паведаміла выданьне dw_belarus з спасылкай на Spiegel, раніцай у яго правялі ператрусы ў некалькіх памяшканьнях у Бэрліне, Баварыі і на Маёрцы.

Ператрусы праводзілі 11 пракурораў і каля 70 паліцыянтаў. У часе сьледчых дзеяньняў вынялі дакумэнты і носьбіты інфармацыі, якія, паводле пракуратуры, «цяпер аналізуюць на прадмет наяўнасьці доказаў, якія яго выкрываюць або апраўдваюць».

Расьсьледаваньне справы супраць Пэтра Быстрана зьвязанае з справай вакол прарасейскай прапагандысцкай плятформы Voice of Europe. У канцы сакавіка ўлады Чэхіі заявілі, што раскрылі «сетку ўплыву, якую фінансавалі з Расеі» і якая распаўсюджвала расейскую прапаганду ў Эўропе і падкупляла эўрапейскіх палітыкаў. Voice of Europe, паводле іх, — частка гэтай схемы. Раней аналягічную заяву зрабілі ў Польшчы.

У лістападзе 2022 году Пэтр Быстран таемна прыяжджаў у Беларусь — гэтую інфармацыю ён прыхаваў ад сваіх калегаў. Тады, паводле яго, ён сустракаўся з тагачасным міністрам замежных спраў Уладзімерам Макеем, а таксама з дэпутатам Андрэем Савіных. Апроч гэтага, ён меў сустрэчы з прадстаўнікамі беларускіх праўладных арганізацый — «Беларускага фону міру» і «Беларускага інстытуту стратэгічных дасьледаваньняў».

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG