У ЗША бацькоў падлетка, які застрэліў чацьвярых аднаклясьнікаў, 9 красавіка асудзілі да пазбаўленьня волі на 10 гадоў кожнага, далей іх могуць вызваліць умоўна-датэрмінова або працягнуць тэрмін зьняволеньня.
Судзьдзя ў штаце Мічыган выказаў шкадаваньне наконт страчаных магчымасьцяў, якія маглі б перашкодзіць сыну-падлетку завалодаць зброяй, паведамляе Associated Press.
«Гэтыя прысуды не зьвязаныя з дрэнным выхаваньнем дзяцей», — заявіла судзьдзя акругі Окленд Шэрыл Мэцьюз. — Гэтыя абвінаваўчыя вэрдыкты пацьвярджаюць неаднаразовыя дзеяньні ці бязьдзейнасьць, якія маглі б прадухіліць злачынства».
Гэта першы выпадак у ЗША, калі за падобнае злачынства пакаралі бацькоў стралка, піша CNN.
Бацькі падлетка Джэніфэр і Джэймс Крамблі ня ведалі, што ў Ітана Крамблі быў пісталет у заплечніку, калі падвезьлі яго ў Оксфардзкую сярэднюю школу. Пракурорам, аднак, удалося пераканаць прысяжных у тым, што бацькі адыгралі катастрафічную ролю ва ўзброеным інцыдэнце.
Крамблі-старэйшага абвінавацілі ў тым, што не ўсачыў за зьнікненьнем з дому нядаўна набытага пісталета. Абодва бацькі паводзілі сябе абыякава да прыкметаў пагаршэньня псыхічнага здароўя сына Ітана.
Адвакаты абароны імкнуліся зьберагчы мужа і жонку Крамблі ад турмы, адзначаючы, што яны ўжо правялі ў турме амаль 2,5 гады пасьля таго, як не выплацілі заклад у памеры 500 тысяч даляраў пасьля арышту.
Ім будзе залічаны час турэмнага зьняволеньня. У выніку прымяненьня практыкі так званага нявызначанага прысуду яны атрымаюць права на ўмоўна-датэрміновае вызваленьне пасьля 10 год зьняволеньня. Калі ў вызваленьні з турмы будзе адмоўлена, іх могуць затрымаць у турме на тэрмін да 15 гадоў.
30 лістапада 2021 году іх сын выцягнуў з заплечніка пісталет і пачаў страляць, забіўшы чатырох вучняў школы ў прыгарадзе Дэтройта і параніўшы яшчэ сем чалавек.
Па выніках суду Ітан Крамблі атрымаў пажыцьцёвае зьняволеньне за напад на сярэднюю школу Оксфарда.
