Суд Ленінскага раёну Магілёва прызнаў былога палітвязьня Паўла Белаголава невінаватым паводле адміністрацыйнага артыкула ў распаўсюджваньні «экстрэмісцкіх» матэрыялаў, паведамляе тэлеграм-канал MAYDAY TEAM.
Згодна з адміністрацыйным пратаколам, мужчына 26 лістапада 2020 году захаваў у сябе ў мэсэнджары Viber ва ўкладцы «Мае нататкі» спасылку на матэрыял выданьня Tribuna, якое ўключылі ў сьпіс «экстрэмісцкіх» матэрыялаў 25 жніўня 2021 году, і ў сьпіс «экстрэмісцкіх» фармаваньняў 5 сьнежня 2023 году.
Паўла Белаголава затрымалі 22 лютага 2024 году, бо ён ня выдаліў тую спасылку з нататак. Ленінскі РУУС завёў на яго адміністрацыйную справу за «распаўсюд экстрэмісцкіх матэрыялаў», аднак судзьдзя Натальля Панасенка пастанавіла, што Белаголаў невінаваты.
«Не прадстаўлена доказаў, якія пацьвярджаюць, што вышэйназваную інфармацыйную прадукцыю Б. захоўваў у катэгорыі „Мае закладкі“ з мэтай распаўсюджваньня», — гаворыцца ў рашэньні, апублікаваным у Банку судовых пастановаў.
Судовае паседжаньне прайшло 23 лютага, але вынікі праваабаронцам сталі вядомыя толькі цяпер.
29 верасьня 2021 году Паўла Белаголава затрымалі па «справе Зельцара» і 25 жніўня 2022 году асудзілі на 2 гады і 6 месяцаў пазбаўленьня волі за «абразу прадстаўніка ўлады» (артыкул 369 КК) і «дыскрэдытацыю Рэспублікі Беларусь» (артыкул 369-1 КК). Ён цалкам адбыў свой тэрмін і выйшаў на волю 10 кастрычніка 2023 году.
