Пра гэта паведаміў агенцтву ТАСС старшыня Грамадзкай назіральнай камісіі Масквы Георгій Волкаў. Паводле яго, хадайніцтва Яфрэмава пра ўмоўна-датэрміновае вызваленьне было ўхваленае адміністрацыяй калёніі ў Белгарадзкай вобласьці, дзе ён адбывае пакараньне.
Канчатковае рашэньне пра датэрміновае вызваленьне Яфрэмава павінен будзе вынесьці суд, яго дата пакуль невядомая.
8 чэрвеня 2020 году Міхаіл Яфрэмаў трапіў у аварыю ў Маскве. Яго аўтамабіль урэзаўся ў фургон, кіроўца фургона памёр у бальніцы ад атрыманых траўм. Як паказала экспэртыза, актор сеў за руль п’яным.
У верасьні 2020 году суд прыгаварыў Яфрэмава да васьмі гадоў калёніі. Пазьней гэты тэрмін быў скарочаны да сямі з паловай гадоў, бо актор кампэнсаваў маральную шкоду сваякам загінулага.
Справа выклікала вялікі грамадзкі рэзананс у Расеі. Яфрэмаў прызнаў сваю віну і раскаяўся.
Міхаіл Яфрэмаў — заслужаны артыст Расеі, вядомы ролямі ў дзясятках фільмаў і на тэатральнай сцэне. Ён таксама ўдзельнічаў у праектах «Гражданин поэт» і «Господин хороший», у якіх чытаў вершы Дзьмітрыя Быкава з сатырычным зьместам, часта крытычныя ў адносінах да расейскіх уладаў.
