Жыхары гораду Воткінск ва Ўдмуртыі ўвечары ў сераду паведамілі аб магутным выбуху непадалёк ад гораду. Яны выклалі ў сеціва свае відэа, на якім высокае полымя, што ўзьнікла пасьля выбуху.
У некаторых тэлеграм-каналах зьявіліся паведамленьні, што выбух выкліканы тэхнічнымі работамі на Воткінскім машынабудаўнічым заводзе. Там спасылаюцца на рэгіянальную службу МНС. У афіцыйным канале МНС па Ўдмуртыі на момант публікацыі навіны такіх тлумачэньняў, аднак, не было, адзначае расейская служба Свабоды.
Тэлеграм-канал «База» са спасылкай на крыніцу паведамляе, што прычынай выбуху сталі нейкія выпрабаваньні на Воткінскім заводзе. У Адзінай дыспэтчарскай службе Заўялаўскага раёну Ўдмуртыі ТАСС паведамілі, што выбух адбыўся падчас плянавых выпрабаваньняў ракетных рухавікоў.
Падрабязнасьцяў з афіцыйных крыніц і зьвестак аб пацярпелых пакуль няма.
Воткінскі завод разьмяшчаецца за 50 кілямэтраў ад сталіцы Ўдмуртыі Іжэўску. Ён выпускае артылерыйскія ракеты, у тым ліку балістычныя ракеты стратэгічнага прызначэньня для комплексаў «Тополь-М» і «Іскандэр».
У канцы 2023 году Воткінскі завод апублікаваў 19 дзяржкантрактаў на вытворчасьць складнікаў да ядзерных узбраеньняў. Пры заводзе дзейнічае выпрабавальны палігон.
