Ад раку памерлі каля 17 тысяч пацыентаў. Такія зьвесткі на прэс-канфэрэнцыі ў Нацыянальным прэс-цэнтры прывёў намесьнік дырэктара ў навуковай працы РНПЦ анкалёгіі і мэдыцынскай радыялёгіі, доктар мэдыцынскіх навук Сяргей Красны, якога цытуе сайт Reform.by.
Паводле яго, чакаецца, што да 2050 году ў сьвеце колькасьць новых выпадкаў анкалёгіі павялічыцца ўдвая. Сытуацыя ў нашай краіне разьвіваецца ў рамках гэтага трэнду.
«Колькасьць новых выпадкаў у нас вагаецца каля 50 тыс. Гэта значыць, кожны год выяўляецца каля 50 тыс. новых выпадкаў. У 2019 годзе, да пандэміі ковіду, было выяўлена 54,5 тыс. новых выпадкаў. Прычым гэтая лічба кожны год павялічвалася прыкладна на 1,3 тыс. Калі б мы прагназавалі звычайную сытуацыю, без пандэміі ковіду, то ў 2023 годзе колькасьць новых выпадкаў павінна было дасягнуць 59-60 тыс. Аднак вы ведаеце, што было рэзкае зьніжэньне захворваньня ў 2020-м, амаль на 20%, гэта значыць на 10 тыс. было выяўлена менш выпадкаў; тое ж самае было ў 2021 годзе. У 2022 годзе гэтая лічба пачала павялічвацца: было выяўлена 51,5 тыс. выпадкаў.
У 2023 годзе, гэта папярэдняя лічба, яна будзе скарэктаваная, складзе арыентыровачна 56,5 тыс. Калі мы будзем параўноўваць з папярэднімі гадамі, нібыта як рэзкі рост: па 5 тыс. за год дадаецца. Але на самой справе мы не дасягнулі яшчэ прагнозных паказчыкаў, ня выйшлі з гэтай ямы зьніжэньня захворваньня», — сказаў ён.
На думку Сяргея Краснага, ужо ў 2024 годзе колькасьць выпадкаў анкалягічных захворваньняў, якія выяўляюцца, вернецца ў «графік» і будзе ісьці іх павольны прырост.
Сьмяротнасьць ад раку падчас пандэміі таксама зьнізілася адразу на 6% за год.
«Цяпер гэтая лічба стабілізавалася, знаходзіцца на тым жа ўзроўні, але мы можам прагназаваць невялікае павелічэньне, хутчэй за ўсё, сьмяротнасьці. Але гэта будзе не сапраўднае павелічэньне, а вяртаньне да тых лічбаў у адносінах да захворваньня. У Беларусі ў 2023 годзе памерлі каля 17 тыс. пацыентаў анкалягічных. Гэтая лічба такая ж прыкладна, як у 2022 годзе», — сказаў Красны.
Найбольш распаўсюджанымі відамі анкалягічных захворваньняў у мужчын у Беларусі зьяўляюцца рак прастаты, рак лёгкага і рак тоўстай кішкі. У жанчыны на першым месцы рак малочнай залозы, рак тоўстай кішкі і розныя пухліны гінэкалягічнай сфэры.
Асаблівасьць Беларусі — распаўсюджанасьць раку тоўстай кішкі. Па словах Сяргея Краснага, гэта зьвязана з асаблівасьцямі харчаваньня.
«У нас не прынята ёсьць шмат гародніны, садавіны. У нас за гародніну прымаецца бульба, што не зусім правільна. Гэта сапраўды гародніна, але з пазыцыі здаровага харчаваньня няма такой карысьці ад бульбы, як ад гародніны. Гэта ўсё ж гародніна, які зьмяшчае вялікую колькасьць крухмалу. Акрамя таго, у беларусаў прынята ёсьць вельмі шмат мясных прадуктаў, у прыватнасьці чырвонага мяса, што таксама можа спрыяць разьвіцьцю пухлін тоўстай кішкі. Ну і сюды трэба яшчэ аднесьці маларухомы лад жыцьця і наяўнасьць такіх прадуктаў, якія мы адносім да фастфуду», — сказаў намесьнік дырэктара РНПЦ.
Яшчэ адным фактарам ён лічыць малую распаўсюджанасьць прафіляктыкі: правядзеньне калёнаскапіі з выдаленьнем паліпаў. У разьвітых краінах сьвету дадзеная працэдура больш распаўсюджана. Сяргей Красны адзначыў, што яна можа перадухіліць да 80 працэнтаў выпадкаў раку тоўстай кішкі.
